Һәрбер транспортның үз кагыйдәсе

Шуңа да мопед яки скутер белән идарә иткәндә нинди кагыйдәләрне үтәү зарури булуы турында дәүләт автомобиль инспекциясенең Балтач бүлекчәсе җитәкчесе Рафил Шәймөхәммәтов җавап бирә:

– бу төр транспортларга 16 яше тулганнар һәм М яки башка төр категория йөртү таныклыгы булганнар гына утыра ала.

– Мопед һәм скутерда трассага чыкканда юл уртасыннан барырга ярамый. Кагыйдә нигезендә, мондый транспортлар юл читеннән генә хәрәкәт итәргә тиешләр.

– Мопедта яки скутерда барганда фараның якыннан күрсәтә торган уты янарга тиеш.

– Транспорт чарасында йөртүченең дә, пассажирның да шлем киюе мәҗбүри.

– Рульне ике кул белән тотарга кирәк.

– Бердән артык пассажир алырга ярамый.

– Скутер һәм мопедта пассажирларны йөртү ышанычлы аяк куйгычлар булганда гына рөхсәт ителә.

– Тавыш сигналы эшләмәгәндә, тормоз сис-темасы, тышкы яктырткычлар, двигатель төзек булмаганда, шиналар бозылганда әлеге төр транспортлар белән юлга чыгу тыела.

– Рафил Равилевич, әлеге юл хәрәкәте кагыйдәләре үтәлмәгән очракта нинди җәзалар каралган?

– Мопед һәм скутерны иярләүчеләр юл хәрәкәте кагыйдәләрен бозган өчен автомобиль йөртүчеләр белән бер үк тәртиптә административ җаваплылыкка тартыла. Шулай итеп, мопедны яки скутерны йөртү таныклыгыннан башка иярләүчеләр өчен 5 мең сумнан 15 мең сумга кадәр штраф каралган (РФ административ хокук бозу Кодексының 12.7 маддәсе 1нче өлеше). Скутерда яки мопедта шлемсыз йөргән өчен мең сум түләргә туры киләчәк.