Пычрак номер белән йөргән өчен шофер машина йөртү хокукыннан мәхрүм ителәме?

— Пычрак номер белән йөргән өчен шофер машина йөртү хокукыннан мәхрүм ителергә мөмкин дип ишеттем. Ачыклык кертегезче?

Сорауга җавапны район ЮХИДИ бүлеге җитәкчесе Искәндәр Мөбарәкшин бирде:

— Юк, пычрак номер өчен түгел ул. 2024 елның 14 октябреннән 342-ФЗ номерлы Федераль закон үз көченә керде, ул Административ хокук бозулар турында Россия Федерациясе Кодексының 12.2 маддәсенә үзгәрешләр кертте. Аның нигезендә автомобильнең номеры урынына откидной рамка яки транспорт чарасының номерын яшерү өчен яктылыкны кире кайтара торган пленкалар яки башка махсус җайланмалар кулланган очракта, машина йөртү хокукыннан 1 елдан алып 1 ел да 6 айга кадәр мәхрүм итү каралган. Ә номерны яшерү өчен кулланган җайланма конфискацияләнә. Моннан тыш, дәүләт теркәү билгесеннән, ягъни номердан башка яки төрле җайланмалар ярдәмендә номерны укымаслык итеп үзгәрткән очракта да алда әйтеп үтелгән җәзалар каралачак. Шоферлар бу очракта да 1 елдан 1 ел да 6 айга кадәр машина йөртү хокукыннан мәхрүм ителәчәкләр.