93 яшьлек сугыш ветеранын хезмәт урынында котладылар

Хәбәр иткәнчә, 23 апрель көнне районыбызныӊ сугыш ветераннарыныӊ өйләренә барып, район башлыгы Рамил Нотфуллин Татарстан Президенты Рөстәм Миӊнехановныӊ Рәхмәт хатын һәм республикадан, районнан әзерләнгән бүләкләр тапшырды.

Чепья авылыныӊ «Халыклар Дуслыгы» музее директоры, 93 яшьлек сугыш ветераны Гарифҗан ага Галиев кына өйдә түгел иде. Ул кунакларны эш урынында, музейда каршылады. «Музей төзелгәннән бирле мондый зур ремонтныӊ уздырылган юк иде, күӊелем бик шат, әмма һәрбер эшнеӊ барышын үзем тикшерәм”, - ди сугыш ветераны. Һәйкәл янында бүләкләрне кабул итеп алган ветеран, озак тормыйча, эшләнгән эшләр белән таныштыру өчен район башлыгын музей бинасына әйдәде. Гарифҗан ага Галиевны котларга килгән һәркем, аныӊ бетмәс-төкәнмәс энергиясенә, максатчан һәм булсын, дип яшәвенә, эшләвенә сокландылар, аӊа озын гомер теләделәр.