Арбор – кабатланмас авыл (фото)

- Үзегез күреп торасыз, халыкның ничек яшәгәне капка төбеннән үк беленә. Юлларыбыз яхшы, балалар бакчасы, мәктәп, кибет, клуб, пункт, почта бүлекчәсе гөрләп эшли. Авылда шәхси эш белән шөгыльләнүчеләр дә шактый. Проблемалар бар дип әйтергә хакыбыз да юк. Нинди матур тормышта яшибез, - ди авыл старостасы Габделбәр Гозәеров.

Чыннан да, эшлим, яшим дигән кешегә авылда мөмкинлекләр бар. Нигездә, халык "Арбор" җәмгыятендә эшли икән. Хезмәт хакы вакытында түләнә, ашлык, печән-саламы бирелә, диләр. Быел исә саламын бушлай ук биргәннәр. Халык биредә мал-туарны бик күпләп асрый икән. Биш баштан артык сыер асраучылар да бар. Сөтне авылдашлары Резеда Әсхадуллина җыя. Сөткә хакны да вакытында, хилафлыкларсыз түли, диләр. Шәхси эшмәкәрлек белән шөгыльләнүчеләр дә авылдашларын эш белән тәэмин итә. Рафил Габделхаков, Ришат Мостафин, Харис Һадыев шундыйлардан.

Авыл үзенең күркәм гаиләләре белән дә чын мәгънәсендә горурлана ала. Ләйсән-Фәрит Гариповлар, Рәйсә-Мансур Бәхтияровлар, Суфия-Миңсур Хәйруллиннар, Эльмира-Марат Хәкимовлар, Фәридә-Мөхәммәт Әхмәтҗановлар, Гөлүзә-Линар Шакировлар һәркем өчен үрнәк булып тора.