Балаларыбыз бүре булмасын , яки үз үрнәгебездә матур тәрбия бирик

Бүген мин дә үземнең укытучы булып эшләгән елларымны искә төшереп, балаларыбызның нинди укучы икәнен белер өчен мәктәпкә бардым. Ишектән килеп керүгә үк вахтада кизү торучы ханым кем булуым, нинди максат белән килүемне кызыксынды. Үзем белән таныштырып, кайсы сыйныфның әти-әнисе булуымны әйткәч, эчкә уздырды. Мин килгәндә дәрес вакыты иде. Озак та үтмәде кыңгырау чыңлады. Тынлык хөкем сөргән коридорлар балалар авазына күмелде. Улым укыгын сыйныфта математика дәресе буласы икән. Сыйныф җитәкчебез мине дәрес буласы кабинетка озатып куйды. Дәрескә укытучыдан да артык дулкынланып кердем. Балалар өчен йөзем кызармасмы? Укучылар дәрестә ничек катнашыр? Сорауларга җавап бирә алырлармы? Математика дәресен бишенчеләрдә яшь, әмма бик өметле укытучы Миләүшә Әнәсовна укыта икән. 45 минутның үткәнен сизми дә калдым. Балалар белән үзем дә әлеге теманы кабаттан өйрәндем. Укытучының теле йөгерек, үз фәнен бик яхшы белә, класс белән эшләү күнекмәсе югары. Әмма балаларыбызның әдәп ягы бик аксый икән әле. Хөрмәт дигән олы хис барлыгын да өйрәтеп бетермәгәнбез шикелле. Шунысын әйтим, дәрескә баруымның максаты кемнеңдер баласын аерып күрсәтеп, хурлау түгел иде. Бары өйдә һәрберебезнең бик тә тәртипле булган балаларыбызның мәктәп дигән олы патшалыкта үзләрен кем итеп хис итүен ачыклау иде.

Балалар белән мәктәптә генә түгел, урамда да еш очрашырга туры килә. Иң беренче чиратта, хәзерге заман балалары исәнләшә белми. Җәмәгать транспортында өлкәннәргә урын бирү мәсьәләсе дә бик аксый әле. Сүз дә юк, бер генә кешенең дә үз баласы турында начар сүз ишетәсе килми. Һәркемгә үз баласы бик якын һәм кадерле. Начар гамәлләр кылулары турында сөйләшкәндә дә күпчелек әти-әни чәчрәп үз баласын яклап чыга. Берьяктан караганда шулай булырга тиеш тә, үз балаңны үзең якламасаң, кем яклар? Әмма, иң беренче чиратта, һәрчак килеп туган хәлне төптән анализлау кирәктер. Кайбер әти-әниләрнең балалар янында ук укытучы турында начар фикерләр әйткәнен ишеткәнем бар. Юкса, мәктәпкә, укытучыга карата мәхәббәтне дә, нәфрәтне дә без- әти-әниләр тәрбиялибез бит. Гаиләдә әти-әни ике-өч баланың тәрбиясен ныклы контрольгә ала алмаганда, укытучы ничек итеп 25-30 баланы тәрбияләп бетерсен, ди. Тәрбиянең башы гаиләдә. Менә шуны онытмаска кирәк.

Замана алга барган саен, буыннар яшәрә. Хәзерге чор әти-әниләренең таләпләре башка:"Эше шул, укытсын, акча ала бит. Нигә балага начар билге куйган? Партадашы күпкә яхшы укый мени, нигә аңа бишле?" кебек таләп һәм сораулар еш яңгырый. Бала мәктәпкә гаиләдә алган башлангыч тәрбия белән килә, ә укытучы аны камилләштерүче генә. Татар халкында бик мәгънәле әйтем бар, бүре баласын бүреккә салсаң да, урманга кары, диләр. Балаларыбыз бүре булмасын иде. Аларга үз үрнәгебездә матур тәрбия бирик.

Фото: minibanda