Балтачта «Җиңү диктанты»н дүрт мәйданчыкта язарга мөмкин булачак

Быелның 3 сентябрендә 14.00 сәгатьтә «Җиңү диктанты» язачакбыз. Ул Бөек Ватан сугышы вакыйгалары темасына багышлана. Катнашучылар 25 сорауга 45 минут эчендә җавап бирергә тиеш.
Диктантны «Бердәм Россия» партиясе «Тарихи хәтер» проекты кысаларында оештыра. «Җиңү диктанты»н Татарстанның барлык районнарында язалар, безнең Балтач районында аны Балтач гимназиясендә, Куныр, Арбор, Түбән Кенә мәктәпләрендә язу каралган. Анда катнашу өчен диктантпобеды.рф (https://диктантпобеды.рф/) рәсми сайтында теркәлү узарга кирәк. Тестны диктант язу мәйданчыкларында да, онлайн форматта да узарга була. Диктант нәтиҗәләре ел азагында билгеле булачак.