Бүгенге тормыш оҗмахка тиң, ди Корбангалиевлар

Тәлгать абый 1936 елныӊ июлендә Көшкәтбаш авылында туган, Мәймүнә апа да шушы авыл кызы. Алар 5 бала тәрбияләп үстерәләр. Бүгенге көндә ике улы һәм бер кызлары үз гаиләләре белән Көшкәтбаш авылында гомер кичерәләр, бер уллары Балтачта, берсе Уралда Югары Түрә шәһәрендә яши. Өлкәннәр төп йортта уллары Фәиз, киленнәре Гамилә һәм ике оныклары белән гомер кичерәләр. Уллары Фәиз “Уңыш” җәмгыятендә механизатор, киленнәре Көшкәтбаш балалар бакчасында пешекче булып эшли. Тәлгать һәм Мәймүнә Корбангалиевлар 11 оныклары һәм 10 оныкчыклары өчен дә бик кадерле кешеләр.

– Бүгенге көндә шөкер мул тормышларда, кадер-хөрмәттә яшибез. Ачлык елларында дөньяга килеп, авыр тормыш белән көн күргән безнең буын өчен бүгенге тормыш оҗмахка тиң. Инде сугышлар булмыйча, иминлектә яшәргә язсын, – дип тели өлкәннәр.

Әниләр көне уңаеннан район күләмендә үткәрелгән “Ак чәчәкләр сезгә, ак җаннар” бәйрәм чарасында Корбангалиевлар гаиләсе дә катнашты.

– Туган авылыгызга, районыбызга игелекле хезмәт күрсәтүегез өчен сезгә олы рәхмәтләремне ирештерәм. Картлыгыгыз тигезлектә, саулыкта үтсен, – диде район башлыгы Рамил Нотфуллин бәйрәм барышында.