Бүләк отучы Гүзәлия Романова менә ниләр диде

«Татмедиа» җәмгыяте үзенең басмаларына язылган абунәчеләр арасында скутер, телевизор һәм башкалар кыйммәтле бүләкләр уйнатты.

Бәхетле абунәчеләр исемлеге билгеле. Алар арасында райондашыбыз да бар. Ул Гүзәлия Романова, Сосна авылыннан. Гүзәлия ханым тонометр отты.

Гүзәлия Романова озак еллар «Сосна» җәмгыятендә терелекчелектә эшләгән. Район газетасы «Хезмәт»не яратып укыйбыз, ди. Өч бала үстергән, икесе Казанда яши.

– «Хезмәт» газетасына янына оныкларым өчен «Салават күпере», «Сабантуй» журналы да яздыртам. Авылга кайткач алып китәләр, балаларыма бу ике журнал да бик ошый, яратып укыйлар,– ди Гүзәлия ханым.

Менә бит! Шәһәрдән авылга, авылдан шәһәргә! Татар матбугатын шул тәртиптә дә укыйлар. Бу урында яшәсен авыллар, яшәсен әти-әниләр, әби-бабалар диясе килә.

Гүзәлия апага кан басымын үлчи торган приборны тапшырганда ныклы сәламәтлек теләдек, бик кирәк әйбер бу миңа, яшь барган саен кан басымы да сиздерә, гел үлчәп кенә торырга кирәк, ди. «Татмедиа» җәмгыятенә һәм дә «Хезмәт» газетасына абунәчеләрен файдалы бүләкләр белән куандырып торганы өчен зур рәхмәтләрен белдерде Гүзәлия апа. Игелекле бүләкләр булсын, гел дә шулай безнең ышанычлы язылучыбыз булып калыгыз!