Әфганчыларның истәлекле көне (фото).

Ильнур, 13 февраль 2015 - 17:29

2495

13нче февраль көнне әфганчы-интернационалистлар үзләренә генә хас бәйрәм тантанасына җыелдылар. Районыбыз җиреннән бу канкойгыч дәһшәтле сугышка 173 кеше китә, бүгенге көндә аларның 118е Балтачта яши, ә 31е вафат.

Тантанага җыелганнар иң элек һәйкәлгә венок һәм сугышта һәлак булган, кайткач вафат булганнар истәлегенә куелган мемориаль такталарга чәчәкләр салдылар. Аннары хәрби комиссариатта җитәкчеләр белән очрашып, үзләрен борчыган мәсьәләләрне хәл иттеләр, фикер-тәкъдимнәрен ирештерделәр.

Әфганчыларыбыз колоннага тезелеп, бистәнең үзәк урамы буйлап "Батырлар аллеясы"на юл алдылар. Биредә шулай ук һәйкәлгә венок кую тантанасы булды.

Мәдәният үзәгендә алар хөрмәтенә концерт программасы тәкъдим ителде. Һәртөрле чараларда активлык күрсәткән әфганчыларны бүләкләп уздылар. Рамил Кадыйров, Фидаил Садыйков, Рифат Вәлишин, Илшат Нурмөхәммәтов, Геннадий Тимофеев, Фәиз Фәйзрахманов, Тәбрис Насруллин, Әхмәтхан Гәрәев, Рәдис Гыйләҗев, Рәис Мөхәммәтшин, Газинур Зиннәтуллин, Владимир Гавриловлар район әфганчылар оешмасы исеменнән истәлек бүләкләренә ия булдылар.