“Казан арты”н Гөлназыбыз үз итте

Форумда Татарстанның Арча, Әтнә, Саба, Биектау, Кукмара, Теләче, Мамадыш районнары, Яр Чаллы шәһәре, Башкортстан республикасы, Чувашия, Удмуртия, Марий Эл, Киров, Ульяновск, Оренбург, Самара төбәкләре катнашты. Шулай ук биредә безнең районыбыздан Гөлназ Әсхадуллина да булып кайтты.

Ул әлеге форум турындагы тәэсирләре белән безнең белән дә бүлеште. "Форум бик эчтәлекле булды. Бөтендөнья татар яшьләре форумының эшчәнлеге, проектлары белән таныштык. Көн дәвамында күп кенә файдалы лекцияләр тыңладык. Казан арты районнары һәм Россия төбәкләреннән килгән яшьләр үзләренең проектларын тәкъдим итте, борчыган сорауларына җавап таба алдылар. Татар теленең бүгенге халәте турында озак кына сөйләшү булды. Гомумән алганда, мин үзем өчен күп кенә яңа идеяләр, дуслар табып кайттым".
Катнашучыларны ике көнлек интенсив проектлар ярминкәсе, дөньякүләм брендлар белән танышу, "җирле"не үстерү буенча остаханәләр, Казан арты тарихы буенча лекторийлар, бизнес һәм сәнгать вәкилләре белән очрашулар һәм башка кызыклы чаралар көткән. Ахырда оештыручылар катнашучыларга кызыклы "мозговой штурм" әзерләгән.

tatar-inform.tatar