Кенәбаш ханымнарын бәйрәм белән шагыйрә котлаган

Чара барышында шагыйрә турында бик матур һәм гыйбрәтле сүзләр яңгырады: "Райондашыбыз Мәгъмүрә апа Хөрмәтуллинаны барыгыз да белә торгандыр.
Пыжмара авылы кызы Мәгъмүрә Хөрмәтуллина шигърияткә шактый соңлап, 50 яшендә килә.Бәлки шуңадыр да иҗатка шактый бай тормыш тәҗрибәсе, кызыклы күзәтүләре,тормыш турында гыйбрәтле фәлсәфәләре белән килгәнгәдер, иҗат дөньясына бәреп керде ул. Аның гади тел, тирән мәгънә белән язган шигырьләре тиз арада үз укучысын тапты.
“Нигә гомер ике килми икән,
Ике тумый кеше анадан?
Хаталарсыз гына яшәр идем
Туар идем җиргә яңадан, - дип яза ул. Я, әйтегез, кемнең җаны шулай бәргәләнми?!
Әмма ул башкалардан үзгә, аның шигъри җаны толлар-ялгызлар өчен дә сызылый, кешеләр арасындагы мөнәсәбәт, бәхет-мәхәббәт, авыл-табигать темаларын да читләтеп үтми.
Шигырьләрендә генә түгел, Мәгъмүрә апа тормышта да үзен нык, соклангыч көчле холыклы итеп танытты. Күпчелек шигырьләрендә якыннарын бер-бер артлы югалту хәсрәтеннән җан бәргәләнүләрен дә шигырь юлларына салыр көч таба ул.Йөрәгендә янган утны шигырь юлларына салыр көч таба.
Шатлыктан илһам табу, канатлану-монысына күпләр сәләтле.Ишелеп төшкән хәсрәтләрдә, әнә шул “канат”ларны канатмау - монысы сирәкләр холкы. Мәгъмүрә апа әнә шул сирәкләрнең берсе.
Күңелендә шигырь уты йөрткән , иҗат дигән газаплы да, сихри дә дөньяда үз урынын тапкан бу ышаныч беркайчан да югалмасын иде.Әле безне бик күп матур, гыйбрәтле шигырьләре белән сөендереп, сокландырып яшәргә язсын!"

Фотолар: Энҗе Галиәхмәтованыкы

Чыганак: https://vk.com/id286667364?w=wall286667364_5605/all