Көшкәтбашта мәйданчык ачканнар (видео)

«Шәйми тавына балаларга мәйданчык ясап куйган идек. Ничек килеп чыккандыр балалар уйнап яткан булалар үзе, көтү каршысына дип балалар күп җыелалар, ни белән шөгыльләнергә белми аптырап йөриләр иде, шуннан килеп чыккан фикер булды бу. Мәдинә апа белән Мансур абый идеясе һәм алар үзләре артыннан бик күпләрне иярттеләр. Үзебезчә кечкенә генә ачылыш та оештырып алдык», дип хәбәр итәләр Көшкәтбаштан.

Мәйданчыкны ачу тантанасында Илсөяр апа балаларны тәмле мич бәрәңгесе һәм коймак, Резеда апа Хәсәнова телеңне йотарлык чәй токмачы пешергән, әти-әниләр дә тәм- томнар биреп җибәргәннәр.

Киләчәктә мәйданчыкка прожектор да куячаклар икән.

Көшкәтбашлыларның исә бер генә теләге бар, тырыш авылдашлар төзегән мәйданчыкта тәртип һәм чисталык булсын иде. Кич белән яшьләр утырса да, үзләреннән соң мәйданны тәртип итеп калдырырлар дип өметләнәбез. Кешеләргә, аларның хезмәтләренә хөрмәтле булыйк, диләр.