«Лэсьтэм ӟеч уж асьмелы ик ӟечен берытске»

2017-тӥ арысен 5 толсуре Россиын Доброволецъёслэн (волонтёръёслэн) нуналзы пусйиське. Та праздникен валче Балтасьысь калыклы социальной юрттэт сётонъя «Наз» центрлэн базаяз ужась «Волонтёр» добровольческой центрлэн кивалтӥсеныз Сагитова Наталья Михайловнаен пумиськыса вераськимы. Наталья Михайловна центрлэн ужъёсыз сярысь вераз, волонтёръёсын радъям ужрадъёс сярысь но мадиз.

— Наталья Михайловна, «Волонтёр» центрен лыдӟисьёсмес тодматэ вал. Кыӵе ужъёсын выро та центрын тыршисьёс?

— «Волонтёр» добровольческой центр Балтасьысь калыклы социальной юрттэт сётонъя «Наз» центрлэн базаяз 2010-тӥ арысен ужа. Мон ачим 2016-тӥ арысен та центрлэн кураторез луисько. Организацилэн ужамез улсын пӧртэм ужрадъёс ортчо, соос пӧлын пӧртэм социальной акциос, ужрадъёс, пумиськонъёс. Центрысьтымы активистъёс инвалид нылпиоссы луэм семьяослы, трос нылпиё семьяослы, быдэс луымтэ (неполной) семьяослы, озьы ик кулэяськыса улӥсь арлыдоослы юрттэт сёто. 

— Огъя вераса, туннэ нуналлы центрады кӧня волонтёръёс лыдъясько?

— Волонтёръёслэсь лыдзэс шонерак вераны уг луы, малы ке шуоно соос туж трос. Соос пӧлын дугдылытэк ветлӥсьёсыз но, дырын-дырын ветлӥсьёсыз но вань.

— Кызьы тодӥськомы, волонтёр уж понна коньдон уг тыриськы. Нылпиос волонтёр ужен вырыса, асьсэлы кыӵе ке пайда басьтыны быгато-а?

— Котькуд уж — со вачекусыпъяськон. Соин волонтёр ужлэсь секытсэ но кулэлыксэ валаса та ужен вырись нылпиоссылы ваньмыз ласянь юрттӥсь анай-атайёслы тау карисько. Пусъеме потэ, нылпиос туж бадӟым опыт басьто шуыса, малы ке шуоно котькуд ужрад — акция-а со, пумиськон-а — со вераськон, мылкыдъёсын вошъяськон. Тросэз активистъёсмы — школаын дышетскись нылпиос. Мыным соос пӧлысь котькудӥз дуно: соос, асьсэлэсь буш дырзэс жалятэк, ми доры лыкто ук. Сыӵе нылпиослэсь мылкыдъёссэс ӝутон понна, ми соосты таукарон гожтэтъёсын но пусйиськомы, кудъёсыныз соос бератаз портфолиоссэс тырмыто. Со сяна нылпиослэсь лэсьтэм ӟеч ужъёссэс интернет вотэсъёсын возьматӥськомы. Озьы егит волонтёръёсмылэсь мылкыдъёссэс но ӝутӥськомы, центрамы выль доброволецъёсты но кыскиськомы.

— Центрды, зэмзэ но, трос пӧртэм ужрадъёс радъя. Ушъяськымон вормонъёсты но вань шуыса тодӥсько.

— Озьы. Кылсярысь, 5 толсуре егитъёслэн «Хыял» центразы добровольческой ужъёсы тужгес мыло-кыдо пыриськемъёсты пусъён но соослы данъет сётон ужрад ортчиз. Отчы Балтась ёросысь исполкомлэн кивалтӥсезлэн воштӥсез Ильгам Гайнутдинов, Дышетонъя управленилэн начальникез Ренат Мухарлямов, Балтасьысь егитъёслэн ужъёссыя, спортья но туризмъя ёзэтлэн кивалтӥсез Рустам Загидуллин пыриськизы. Центрысьтымы ньыль егит волонтёръёсты кивалтӥсьёс нимысьтыз пусйизы, Таукарон гожтэтъёсты сётӥзы. Озьы ик кемалась ӧвӧл, шонергес вераса сентябрь толэзьысен, добровольчество (волонтёрство) удысын республиканской Премия-2022 ортчиз. Отын 18 номинациосъя добровольческой уж возьматэмын вал. Асьме ёросысь волонтёр, Ципья шоръёзо школаын дышетскись Давид Турганалиев, та Премилэн Лауреат нимыныз пусйиськиз.

— Наталья Михайловна, центреныды лэсьтэм ӟеч ужъёс котьку калыкмес шумпоттозы шуыса оскисько. Ужады азинсконъёс но трос вормонъёс сӥзисько.

— Туж бадӟым тау. Мынам но ас черодам газет лыдӟисьёслы вазиськеме потэ. Оло, та вераськонмес лыдӟыса, центрамы волонтёр луыса ветлыны мылкыд карисьёслэн лыдзы будоз. Ми котькуд юрттыны мылкыд карись адямилы шумпотӥськомы. Ум вунэтэ: лэсьтэм ӟеч уж асьмелы ик ӟечен берытске.