Рафилнең исеме мәңгеләштерелде

Мемориаль тактаны ачу тантанасында Балтач муниципаль район башлыгы Рамил Нотфуллин, хәрби комиссар Васыйл Вәлиев, хәрбинең әти-әнисе, туганнары, сыйныфташлары, дуслары, районның төрле елларда хәрби хезмәттә, шул исәптән «кайнар нокталар»да булган егетләре катнашты. Истәлек тактасы ачылу барышында район хәрби комиссары герой офицерның «Батырлык» орденын әти-әнисе Гүзәлия һәм Фагыйл Гайнетдиновларга тапшырды.

Рафил Фагыйл улы Гайнетдинов укыган елларында ук хәрби булырга хыяллана. Ул, Субаш урта мәктәбен тәмамлагач, Казан танк училищесында белем алган. Таҗикстанда хәрби хезмәт узган, хөкүмәт карары белән Сириягә җибәрелеп, анда хәрби бәрелешләрдә катнашкан. Махсус хәрби операция башлангач үзенең хәрби егетләре белән сугыш хәрәкәтләренә кушыла.

Кызганыч, 12 августта офицерның гомере фаҗигале рәвештә өзелә – десант машинасы дошман минасына эләгә. Батыр райондашыбызның җәсаде 15 августта туган авылы Түбән Субашта җирләнде. Хәрби офицерга бары 31 яшь иде.

Өлкән гвардия лейтенанты Рафил Фагыйл улы Гайнетдиновның исеме йөрәкләрдә мәңге сакланыр!