Салкыннар безгә генә килмәде

Безнең һәрберебез җылы кабинетта эшләячәгенә, җылытылган өйдә йоклаячагына ышана ала. Без үз өебезгә кайтуыбызга ышанабыз. Дошман һөҗүмнәреннән көн саен безне саклый торган сугышчыларыбыз турында алай дип әйтеп булмый. Алар беркайчан да салкын дип әйтмәсләр, вакытлыча булса да җылы урыннарда утыра алмаслар. Һәм, гомумән, алар чираттагы биремнән кайтасыларын да төгәл әйтә алмый.

Безнең районда бик күп ташландык биналар бар, алар, нигездә, буш. Яңгул авылында яңа мәдәният йорты төзелү белән искесе беркемгә дә кирәк булмады. Без бу хакта газетада язып чыккан идек инде. Халык берләшеп, әлеге проблеманы хәл итте һәм биредә гуманитар ярдәм җыю пункты оештырды.

Эш туктамый, әле дә дәвам итә. Һәм безнең һәркайсыбыз үзенең мөмкинлекләреннән чыгып волонтерларга ярдәм итә ала.

Әгәр сезнең әлеге игелекле эшкә кушыласыгыз килсә, сезне биредә маскировка челтәрләре үрергә өйрәтәчәкләр. Тиздән авылда блиндаж шәмнәре әзерләү эшләре башланачак.

Бу изге эшебез калган райондашларыбызга да үрнәк булып, алар да безнең сафларны тулыландырыр дигән өметтә калам.