Шанхай күзәтүчеләре Татарстандагы 100дән артык сайлау участогында булган

Чит илдән килгән вәкилләр Татарстанда сайлау участоклары эшләрен югары бәяли.

(Казан, 18 март, “Татар-информ”, Лилия Локманова). Шанхай оешмасыннан күзәтүчеләр бүген, Россия Президенты сайлаулары кысаларында, 100 дән артык сайлау участогында булган. Бу хакта Шанхай оешмасы күзәтүчеләр Миссиясе әгъзасы Серик Егизбаев хәбәр итте.

Аның сүзләренчә, сайлау участокларының берсендә дә хокук бозу очраклары теркәлмәгән. Алай гына да түгел, Серик Егизбаев яшь гражданнарның актив булуын, кеше кая гына теркәлүгә карамастан, аның башка урында тавыш бирә алу мөмкинлеген, физик мөмкинлекләре чикләнгәннәр өчен шартлар тудырылуын, сайлау участокларында видеокамераларның даими эшләвен, куркынычсызлык чаралары югары дәрәҗәдә оештырылуын, массакүләм матбугат чаралары вәкилләре өчен уңай шартлар тудырылуын югары бәяләде.