Шәҗәрә төзү җиңел түгел

Курсташым Дамир шәҗәрәләр төзү белән шөгыльләнә. Бик озак архивларда, төрле оешмаларда казыну җиңел түгел, әлбәттә, әмма ул аны җиренә җиткереп башкара. Чаллыда яши ул, гаиләсен әлеге тырыш хезмәт хакына туендыра. Ә хезмәтенең   хакы кала өчен әллә ни зур түгел дияр идем, бер сөйләшкәндә егерме мең тирәсе чыга дигән иде, бәлки хәзер арттыргандыр, сорарга да остара төшкәндер.

Кемдер үз буынын үзе барлый. Киләсе атнада безнең районда да район архивы шәҗәрәләр агачы дигән бәйге оештырып ала. Инде эшләр кабул ителә. Райондашларның катлаулы һәм үзенчәлекле хезмәтләре белән сайт укучыларын да таныштырмый калмабыз. Сайтыбызны күзәтеп барыгыз.