Татарстанда авыр яшүсмерләр өчен остазлык проектының икенче этабы старт ала

Проектны тормышка ашыру өчен остазлар туплау игълан ителде. 21 яшьтән алып һәркем остаз була ала. Бу эш ирекле. Остаз булу өчен «Форпост»үзәге белән социаль челтәрләрдә элемтәгә керергә кирәк. Бу хакта ТР Яшьләр эшләре буенча министр урынбасары Алла Кондратьева хәбәр итте.

«Бу проектта без катнашучылар белән индивидуаль үсеш планын формалаштыру, балага карата сизгер мөнәсәбәт һәм аның агымдагы хәлен үзгәртү өчен мөмкинлекләр бирү аша эшләүнең яңа парадигмасы турында сөйләшәбез. Бездә остазлар, психологлар, формаль булмаган белем бирү белгечләре җәлеп ителгән», – дип билгеләп үтте министр урынбасары.

Беренче агым апрель-сентябрь айларында Казанда, Чаллыда, Яшел Үзәндә, Түбән Камада, Әлмәттә һәм Буада тормышка ашырылды. Анда 60 яшүсмер һәм 30 остаз катнашты.

«Үзебезнекеләр» проектының максаты - яшүсмерләр арасында җинаятьчелекне киметү һәм балигъ булмаганнар арасында кабат хокук бозуларны булдырмау, авыр тормыш хәлендә булган яшүсмерләрне социаль файдалы эшчәнлеккә тарту. Яшүсмерләр «Тормыш буяулары» фестивалендә, «Рубеж-Десантник» лагерендә,  Спартакиадада катнаштылар. Моннан тыш, җәйгә автосервис һәм фермага эшкә дә урнаштылар.

Катнашучылар остазларның сизгер күзәтүе астында булдылар, аларның һәркайсына ике-өч балигъ булмаган бала беркетелде. Оештыручылар билгеләп үткәнчә, катнашучыларны социальләштерү процессы өчен процессның иң мөһим өлеше «тиңгә – тиң» диалогын төзү булган.

"Проектның беренче агымы тәмамланганнан соң, балалар сайланган юнәлешләр буенча секцияләрдә һәм түгәрәкләрдә шөгыльләнүләрен дәвам итәләр. Катнашучыларның күбесе Форпост оешмасына керде, эшчәнлекнең төрле юнәлешләре белән кызыксындылар һәм чараларда актив катнашалар", – дип уртаклашты Тимур Камалетдинов.

Нәтиҗәдә, аларның күбесе проектны оештыручылардан тиешле рекомендацияләр җибәргәннән соң, ПДН аларны исәптән төшерде, шулай ук яшүсмерләр белән деструктив тәртиптә эшләү өчен методик база эшләнде. Яңа агымда география Татарстанның 10 районына кадәр киңәйтеләчәк, 100 дән артык яшүсмерне эшкә җәлеп итәргә планлаштыралар.