«Үзебезнең егетләргә», дип тотынган идек (+видео)

- Үзебезнең егетләргә генә дип тотынган идек, – ди активистларның берсе Рәйфә апа Газизова. – Күршем Валентина Иванова идеясе бу, әйдә, миндә ике капчык йон бар, язып-җегәрлик тә, авылыбыздан киткән өч егеткә җибәрик диде дә, мин күтәреп алдым, шул Салам Пүчинкәсендә яшәүче Раушания Фәйзрахманова, Ризидә Фролова, Клара Нәҗипова, Роза Николаева, Нурия Гаязетдинова Валентинаның өенә җыелып, йонны яза башладык, оекбашлар бәйләргә җыенуыбызны ишетеп, тагын йон китерүчеләр булды, тагын язарга утырдык, менә бүген генә әле җегәрли башлыйбыз.
Җегәрләп бетергәч, бергә җыелып, бергә булмаса, аерым өйләрдә бәйли башларга инде исәпләре. Башка урам әбиләре дә кушылырлар дип көтәләр. Нурия әби биш оекбаш бәйләп җибәргән булган инде.
Салам Пүчинкәсе дигәне Югары Субашның данлыклы Дальняя дигән урамы инде. Бу урамда халык бигрәк актив.
Югары Субаштан өч егет мобилизацияләнгән, гаиләле түгел иде, диләр, шулай да һәрберсе әниләренең, әтиләренең газиз уллары алар.