“Карусель” шәп әйләнә

Районыбызда “карусель”ле ферма барлыкка килгәч, аны кемнәр генә күрергә теләмәде, ә җитәкчелекнең бөтен борчылганы ферманың өметләрен аклавы иде. Шөкер, бүгенге көндә биредә 12 тонна сөт савыла. Фермадагы 720 сыер һәм 250 баш тананы 6 сыер савучы тәрбияли. Беренче көннәрдән биредә эшләүче Екатерина Пиляева, Людмила Тарасова, Таисия Хрисанова, Елена Баймановага бүгенге көндә Гөлүсә Мөбарәкшина белән Светлана Антоновалар ярдәм итә.

– Сөт җитештерүчәнлегебез 65 %ка үсте, – ди җәмгыятьнең баш икътисадчысы Розалия Фазылҗанова. – Шуның 32 %ы баш санын арттыру хисабына булса, яртысы сөтлебикәләрнең продуктлылыгы үсүдән. Бозау алуда да артым сизелерлек зур, әйтик, узган ел 749 баш бозау туса, быел 792гә кадәр артты. Ясалма орлыкландыру операторларыбыз Сергей Троков белән Людмила Бидаеваның бер-берсе белән аңлашып эшләү нәтиҗәсе дә бу.

Әйе, биредәге коллектив үз эшләренә җитди карый. Чөнки ферма ышанычлы мөдир – Алсу Гарифҗанова күзәтчелегендә. Ул инде өч дистә елдан артык терлекчелек тармагында кайнашкан кеше. Тырыш хезмәтен олуг бәяләп, “Татарстанның атказанган терлекчесе” исеме белән дә бүләкләгәннәр үзен. Аның кул астында эшләүчеләрнең һәркайсы үз хезмәтләренә тел-теш тидерми торган итеп башкара. Иван Хрисанов, Ирек Хәкимҗанов, Хәлил Шәмсетдинов, Рәйхан Вәлиев, Валерий Антонов, Алексей Кушаев, Сергей Пиляев, Фәнис Фазылҗанов, Илгиз Идрисов, Раил Гыйльванов,  Андрей Андреев – һәрвакыт мактаулылар рәтендә.

Автор фотолары