Адӟем карымон дышетӥсь

Котькуд адямилэн улоназ дышетӥсь бадӟым инты басьтэ. Мон понна тужгес яратоно дышетӥсь луэ Матвеев Олег Николаевич.

Ужзэ яратыса но быгатыса быдэстэмез, адямилыко луэмез, талантэз но нылпиосты пумтэм-йылтэм яратэмез сое туж умой дышетӥсь каризы. Со сыӵе дышетӥсь, кудӥзлэн урокъёсыз йырвизямы гинэ ӧвӧл, сюлэмъёсамы кылё, дышетӥсь, кудӥз тросэзлы адӟем карымон луэ. Мыным туж удалтӥз: вӧзам ас ужзэ яратӥсь адями луиз, кудӥз аслаз дышетэм предметэзлы, физикалы, яратон пыӵатыны гинэ ӧвӧл — ужаны но, наукаез гажаны но, тодон-валан борды кыстӥськыны но дышетӥз.

Матвеев Олег Николаевич 1989-тӥ арысен О. Н. Исаев нимо Ӟаны шоръёзо школаын физикая но информатикая дышетӥсь луыса ужа. 1995-тӥ арын, КГПИ-эз йылпумъяса, вылӥ тодон-валан басьтӥз. Олег Николаевич — зэмос туала дышетӥсь. Сое нылпиос но, дышетӥсьёс но, анай-атайёс но ярато, гажало. Со нылпиослы тодон-валан но сётэ, аслаз предметэныз тунсыкъяськытыны но быгатэ, быгатонлыкъёссэс азинтыны но юрттэ.

Олег Николаевичлэсь басьтэм интервьюысь…

— Олег Николаевич, малы дышетӥсь луыны малпады но малы физикаез бырйиды?

— Пичиысен трос дырме мон инкуазьын, чылкыт омырын ортчытыны яратылӥ. Мыным тунсыко потэ вал инкуазь явлениосты эскерыны, соослэн кылдэмзы сярысь тодыны, тунсыко инкуазь воштӥськонъёсты валэктыны. Та предметэн тунсыкъяськон физикая дышетӥсеным, туннэ нуналэ Ципья шоръёзо школаын ужась Галиуллин Рифат Шайдулловичен герӟаськемын. Солэн эскеремез улсын тунсыко физической опытъёсты пуктылӥмы, задачаосты ужамы, огшоры капчи приборъёсты лэсьтылӥмы. Пумен физикаен тунсыкъяськонэ хоббилы пӧрмиз. Олимпиадаосы пыриськыса, призо интыосты басьтылӥ. Мынам яратоно дышетӥсе кадь луэме потӥз. Школаын дышетскон аръёсысен мон физикаен тунсыкъяськисько, али но сое эскерисько, наукаысь но техникаысь тужгес выль азинсконъёсын, вормонъёсын тодматскисько.

— Ужысьтыды кыӵе умой палъёссэ пусйыны быгатӥськоды?

— Физика предметэз бырйыса экзамен сдавать карем, олимпиадаосы пыриськыса вормем, призо интыосты басьтэм дышетскисьёслэн бервылъёссы монэ тужгес но шумпотто.

— Физикаез но астрономиез дышетонын туннэ нуналэ кыӵе тужгес валтӥсь шуг-секыт вань?

— Валтӥсь шуг-секыт — материально-технической базалэн ляб луэмез, туала физической приборъёслэн луымтэзы.

«Зэм, куддыръя Олег Николаевич чурыт куронъёсты пуктӥсь дышетӥсь луэ, но со шонер, — дышетӥсь сярысь верало дышетскисьёс. — Олег Николаевич ми ваньзэ мед тодомы но мед валаломы шуыса тырше. Котькуд выль тема — со вуоно темаез тодон понна «усьтон». Урокъёсты но котькинлы валамон карыса, тунсыко нуэ, ваньзэ пыр-поч валэктэ. Опытэз ортчытыса адӟем йылпумъянъёсты кагазэ гожтыны дышетэ».

Мон туж шумпотӥсько, милям школаямы Олег Николаевич кадь визьмо но усто дышетӥсь ужа шуыса. Физика — туж секыт, но перспективной наука. Со улонысьтымы вань удысъёсын пумиське: улон-вылонын но, производствоын но.

Ульяна Евдокимова,

О. Н. Исаев нимо Ӟаны шоръёзо школаысь 10-тӥ классын дышетскись

Фото: И. Камалов