Балтась ёросысь храмъёс

Гудырикошкон — туж пӧсь но кысык толэзь. Турын турнан, бакча ужъёс, толлы бакча сиёнъёсты дасян — ваньзэ дыраз ужаса вуттоно. Со дыре ик гудырикошкон православной черк праздникъёслы но узыр толэзь.

Шонергес верано ке, православной осконэн улӥсьёс та толэзе 84 праздникез пусъё! Соос пӧлын Илия Пророклэн нуналыз, Преображение (Преображение Господне), Инмар-Анайлэн Успеньеез (Успение Пресвятой Богородицы) выллем бадӟым праздникъёс; чечы, улмо, пушмульы Спасъёс. Та толэзе апостол Матфеез, Борис но Глеб князьёсты-страстотерпецъёсты, Серафим Саровскоез тодэ ваё. Та нуналъёсы Успенской пост но мынэ. Огъя вераса, али ужъёсты ӧжытак палэнэ кельтыса, лулын шутэтскон понна туж тупамон дыр. Ёросмылэн палэназ потытэк, асьме дорын кытын Инмарлы матэгез кариськыны луэ? Та справочник тӥ понна.

Святитель Гурий Казанскойлэн черкез (Гурьевской черк), Ципья

Татарстанысь митрополитлэн официальной сайтэзлы осконо ке, та черклэн историез туж мур. Туалаез горд кирпичлэсь лэсьтэм черк 1990-тӥ аръёслэн пумаз пуктэмын (нялтас вераса, та черкез вӧсяны 1997-тӥ арын со дырысь Татарстанысь но Казаньысь Митрополит, Архиепископ Анастасий но вуэм). Азьло та черк интыын 18-тӥ даурын лэсьтэм пу черк сылэм. Шонергес верано ке, со пу черкез пуктӥллям 1751-1755-тӥ аръёсы, 1830-тӥ аръёсы излэсь черк лэсьто. Ципьяын азьло дырысен трос калыкъёс улӥзы бере, татчы удмуртъёс, ӟучъёс, поръёс, крашинъёс вӧсяськыны ветлӥллям. Вӧсяськиллям ньыль кылын. Тунсыко: татын туннэ но «Отче наш» вӧськылэз ӟуч, удмурт, бигер но пор кылъёсын лыдӟо.

Черкын котьку чылкыт но чебер. Гужем тужгес но: прихожанъёс черклэн территорияз пӧртэм сяськаосты мертто, котыр утялтыса возё. Татын котькуд адямиез шумпотыса пумитало, нырысетӥзэ черке лыктэм адямиослы ваньзэ рос-прос валэкто. 
Службаос ортчытӥсько шумотэ но ӟучарняе, озьы ик православной праздник нуналъёсы.

Живоначальной Троицалэн черкез (Свято-Троицкой черк), Ципья

Таиз черк интыяськем Гурьевской черк вӧзын ик, вуж клуб сылэм интыын. 2007-тӥ арын, куке Ципьяын выль клуб пуктӥзы, вуж клублэсь интызэ православной калыклы «берыктӥзы». Инмарлы оскись калык шумпотыса шокчиз, малы ке шуоно азьло та клублэн интыяз черк сылэм. Адямиослэн черкез выльысь ӝутэмзы потӥз. Кӧня ке арскын, Татарстанысь но Казаньысь Митрополитлэн, Архиепископ Анастасийлэн бакель каременыз, черкез лэсьтон уж кутскиз. Та уже пыриськиз туж трос огшоры православной калык: нылкышноос но пиосмуртъёс, песянайёс но школае ветлӥсь нылпиос. Котькуд адями тыршиз юрттыны, бадӟым уже аслэсьтыз пичи ке но люкетсэ пыртыны. Туж но туж бадӟым кужымзэс понӥзы со дыре Ципья гуртысь храмлэн настоятелез иеромонах Агафон Журавлёв но иерей Георгий Павлов. 

2012-тӥ арын черклэн куполэз йылэ кирос ӝутӥзы. Выль черкын нырысетӥ литургиез ортчытӥз протоиерей Владимир Иванов. Со вал 2021-тӥ арын. Нош 2022-тӥ арын Казаньысь но Татарстанысь Митрополит Кирилл ачиз черкын литургия ортчытӥз.

Туннэ нуналэ Святитель Гурий Казанскойлэн черказ но, Живоначальной Троицалэн черказ но вӧсьёсты протоиерей Сергий Ничипоренко нуэ. Вӧсьёс ортчытӥсько шумотэ но ӟучарняе, озьы ик православной праздник нуналъёсы но.

Инмар-Анайлэн Казанской обросэзлэн черкез (Казанско-Богородицкой черк), Покчи Лӧзя

Покчи Лӧзяын интыяськем пулэсь лэсьтэм та чебер черк 2006-тӥ арын пуктэмын. Та гуртын азьвыл но сыӵе ик чебер черк сылэм (фундаментэз али но вань). Вуж черклэн алтарез интые йыбырттон (поклонной) кирос пуктэмын. 

Ӧжытак историысь. Покчи Лӧзяын нырысь церковно-приходской школа луэм, 1878-тӥ аръёсы Инмар-Анайлэн Казанской обросэзлэн черкез ужаны кутскем. Со пулэсь лэсьтэмын луэм, нош пуктӥллям сое прихожанъёслэн юрттэменызы. Нырысетӥез вӧсьчи вылэм Иван Цветков нимо ӟуч воргорон, берлогес та ужез иерей Емельян Филипповлы оскиллям. Со, православной канонъёс вылэ пыкъяськыса, нылпиосты лыдӟыны но гожъяськыны дышетэм. 1880-тӥ аръёсы вӧсьчилы черк вӧзы юрт но пуктӥллям.

Со дырысен трос аръёс ортчизы, трос вӧсьчиос та черкын ужазы, ачиз но черк пӧртэм воштӥськонъёс пыр потӥз. Огез гинэ ӧз воштӥськы: та ӝикыт черке калык яратыса ветлэ. Туннэ нуналэ татын иерей Георгий Павлов службаосты нуэ. Вӧсьёс ортчо шумотэ но ӟучарняе, озьы ик черк праздникъёсты но татын уг кельто. 

Пресвятой Богородицалэн Покровезлэн черкез (Покровской черк), Биктеш
Та пичи но чебер черкез дас ар талэсь азьло, 2013-тӥ арын пуктӥзы. 

Биктешын троссэ крашин бигеръёс уло. Та гуртэз кылдытӥллям 18 даурын Дурга, Чура но Яныль гуртъёсысь потэм адямиос. Гуртын 1871-тӥ арын крашин бигеръёслэн приходской школазы усьтӥськем, дышетӥсез — Григорий Алексеев. Берлогес усьтӥськем миссионерской школа, нош 1883-1884-тӥ аръёсы гуртын черк пуктӥллям, со вӧзы — церковно-приходской школа. 1903-тӥ арын гырлыжугонни но ӝуто, ӵапак со арын ик черк но Покровской шуыса нимаськыны кутске. 
Пӧртэм аръёсы та черкын службаосты нуизы пӧртэм гуртъёсысь вӧсьчиос — Илья Ефремов, Василий Уракаев, Владимир Фёдоров но мукетъёсыз. Тунсыко: 1918-тӥ арын кулэм вӧсьчиез Илья Ефремовез черк вӧзы вато, солэн шайгуэз туннэ но вань. Со арын ик, Ымусьтон праздник азьын, уйин черк ӝуа. 

Туннэ нуналэ черкын службаосты иерей Рафаил Фёдоров нуэ. 

Святитель Тихон Амафунтскойлэн часовняез, Дурга 

Та часовня 2019-тӥ арын Дурга гуртлэн шайвылаз пуктэмын. 2020-тӥ арын куполэз йылэ кирос но интыязы. Арлы быдэ Архистратиг Михаиллэн нуналаз, 21-тӥ шуркынмонэ, татчы Ципья черкысь обросъёсын киросэн ветлон (крестный ход) радъяло.
Вань вал Дургаын черк но (нялтас вераса, туннэ со черклэн юртаз нылпи сад интыяськемын), нош лэсьтэмын вал со 1906-тӥ арын. Со дырозь но та гуртын православной вӧсяськон интыос луиллям. Кылсярысь, 19-тӥ даурын татын воргоронъёслэн но, нылкышноослэн но церковно-приходской школаоссы вылӥллям. Луэм Дургаын пулэсь лэсьтэм часовня но. 

Ас дыраз Дургаысь вӧсяськон юртъёсын Илья Ефремов (ӵапак со ик берлогес Биктешын вӧсьчи луэ), Яков Кузьмин, Михаил Устюгов ужаллям. 
Дурга калык вӧсяськон интызэ гажа, уте но чылкыт возе. 

Святитель Николай Мирликийскойлэн черкез (Никольской черк), Гондыргурт

Казаньысь но Татарстанысь Митрополитлэн бакель каременыз, 2019-тӥ арысен Гондыргуртын но выль черк пуктыны кутско. Ужъёс туннэ нуналэ но мыно.
Та гуртын азьло но черк луэм. 1882-тӥ арын, Покчи Лӧзяысь черклэн вӧсьчиезлэн Емельян Филипповлэн кичӧлтэмезъя, Казанской Епархия Гондыргуртэ школа-черк пуктон понна уксё висъя. Со школаын ужало но дышето Роман Безруков, берлогес — Василий Тимофеев, собере — Николай Никифоров. 1929-тӥ арын черк ворсаське но, со юртын покчиёзо школа ужаны кутске.

Гондыргуртысь калыклэн тыршеменыз, татын горд кирпичлэсь туж чебер черк пуктӥське. Оскомы, кӧня ке арскын та черк но адямиосты пумитаны быгатоз шуыса.
Ёросамы интыяськем котькудӥз черк бадӟым но тунсыко историеныз ушъяськыны быгатэ. Черкъёсынымы но соослэн историеныз матынгес тодматскемды потэ ке, таиз ивор тӥ понна: Ципьяысь «Калыкъёслэн эшъяськонзы» музейын али дыре «Балтась ёрослэн православной храмъёсыз» шуыса нимаськись адӟытон ужа. Со радъямын музейын ужасьёслэн тыршеменызы. Отын ёросысьтымы котькуд черклэн историеныз тодматскыны гинэ ӧвӧл, пӧртэм черк атрибутикаосты, вуж вӧсяськон книгаосты но трос мукет тунсыко арбериосты учкыны быгатоды. 

Музейлэн ужан графикез: понедельник-пятница 8.00 часысен 16.00 часозь (12.00 часысен 13.00 часозь — нуназеян вис), суббота — 8.00 часысен 12.00 часозь.

Статья «Калыкъёслэн эшъяськонзы» музейын ужасьлэн Анфиса Анатольевна Ермохиналэн юрттэменыз дасямын