Дан тыныд, лулчеберет удысын ужась!

25-тӥ южтолэзе асьсэлэсь ӧнер праздниксэс пусъёзы лулчеберет удысын ужасьёс. Та праздник юнме гинэ южтолэзе уг пусйиськы, дыр: тулыс инкуазь сайка, мылкыд ӝутске… Нош кин, лулчеберет удысын тыршисьёс ке ӧвӧл, асьсэ быгатонлыкъёсынызы, тыршеменызы асьмелэсь мылкыдъёсмес ӝутоз?

Балтась ёросамы лулчеберет удысын ужасьёсмы ӧжыт ӧвӧл: соос культура юртъёсын, клубъёсын, библиотекаосын тыршо. Нуналлы быдэ секыт но кылкутымон ужзэс быдэстыса, соос асьмелэсь улонмес шулдыргес, тунсыкогес, пӧртэмлыкогес карыны тыршо. Вераны кулэ, соослэн со туж умой пӧрме. Ёросысьтымы одӥгез сыӵе усто лулчеберет удысын ужась — Турья гуртысь клубен кивалтӥсь Исьмекова Ирина Николаевна. Аслаз вордскем гуртаз со кызь арлэсь кема клубын тырше ини: ачиз ик кивалтӥсь, ачиз ик выж миськись, ачиз ик ву нуллӥсь… Вуж кезьыт клубын трос ӝытъёсты ортчытъя ке но, котькуд лыктэм кунозэ пальпотыса пумита со. Ужаны кутскеменыз валче «Вуюись» ансамбль кылдытӥз (берло аръёсы со коллектив «Марӟан» шуыса нимаське), со коллективен туннэ но усто кивалтэ. Ӧнер праздникез азьын Ирина Николаевнаен солэн ужез но Турья гуртысь клублэн улонэз сярысь вераськимы.

— Ирина Николаевна, тӥ кемалась Турья клублэн кивалтӥсез луыса ужаськоды ини. Соин та ужез рос-прос тодӥськоды, ёросысьтымы одӥгез бадӟым опытэн клубен кивалтӥсь луиськоды.

— Шонергес верано ке, 2001-тӥ арысен ужасько клубын. Со дырысен улонын тросэз воштӥськиз ини, огез гинэ уг воштӥськы: мон котьку сямен аслэсьтым ужме яратӥсько, куддыръя туж секыт йӧтэ ке но.

— Лулчеберет удысын ужан понна туж усто луыны кулэ: адямиосын огъя кыл шедьтоно, мыло-кыдо луоно, сценаысен кыл вераны, кырӟаны-эктыны быгатоно… Со быгатонлыкъёстэк та ужын туж секыт, дыр.

— Ужаны кутскыкум, мынам клубын ужан понна нимысьтыз тодон-валанэ ӧй вал. Дышетски мон берлогес — 2009 арын Елабугаысь лулчеберетъя но искусствоосъя училищеез йылпумъяй. Туж юрттӥз мыным ас дыраз ансамбле ветлэме: Ӟаны школаын дышетскыкум, 9-тӥ классысен «Инвожо» ансамбле пыриськи. Школалэн со вакытысь директорез Иван Васильевич Ермаков но ансамбльлэн кивалтӥсез Антонида Петровна Иванова (Павлова), баянист Виктор Павлович Камаев коллективмес туж зол кутӥзы. Тодӥсько на, кызьы Антонида Петровна, котькудмы доры лыктыса, пельзэ ымдуръёсмы доры матэктыса ик кылзӥське вал, кызьы ми кырӟаськомы. Визьмо но ас ужзылэн усточиоссы луись дышетӥсьёслэн кивалтэмзы улсын луэмысь, коллективмы бадӟым вормонъёсы вутскиз, нош милям, ансамбле ветлӥсь нылпиослэн, номаин воштонтэн опытмы люкаськиз. Со басьтэм опытме Турья клубын ужаны кутскеме бере практикаын кутӥ ини.

— Гуртты бадӟым ӧвӧл ке но, калыкты трос ӧвӧл ке но, «Марӟан» коллективеныды пӧртэм творческой конкурсъёсы, фестивальёсы пыриськыны тыршиськоды. Гуртады но ужрадъёс ортчытъяськоды. Ваньмаз вутскыны капчи ӧвӧл, дыр. Гуртты пичи шуыса, ужды но ӧжытгес уг луы…

— Кыӵе ужрадэ гинэ дасяськоно медаз луы, котькуд клубен кивалтӥсьлы нырысь ик гурт калыкен ужано луэ. Мыным со ласянь туж удалтӥз – азьло гуртын трос егитъёс вал, соос мылысь-кыдысь пыриськизы, нош али дыре тросгес мӧйыос ужрадъёсы кыстӥсько. Но со шоры учкытэк, ужаны тыршисько пӧртэм арлыдъем гуртоосыным: нылпиосын но, егитъёсын но, арлыдоосын но. Кылсярысь, спорт ужрадъёс ортчытӥсько — калыкен ӵош люкаськыса велосипедэн ветлӥськом, гужем нюлэскы экскурсиен мынӥськом, профилактической ужрадъёс но радъясько. Трос ветлӥмы палэнын ортчись ужрадъёсы но — Малмыже, Вятской Полянае, Ижкаре. Репертуармы паськыт: быдэстӥськом калык но фольклор кырӟанъёсты ӟуч но удмурт кылъёсын, эстрадной, фольклор эктонъёс возьматӥськомы…  Тыршисько гуртам пӧртэм праздникъёслы сӥзем концертъёс радъяны но. Кемалась ӧвӧл гурт калыклэн пыриськеменыз но юрттэменыз 23-тӥ тулыспаллы но 8-тӥ южтолэзьлы концерт радъямы. Пичи гинэ гуртысьтымы но (нялтас вераса, Турья гуртын туннэ нуналэ 149 адями лыдъяське, улоно коркаослэн лыдзы ваньзэ-ӧвӧлзэ 40 гинэ) шӧдскымон трос адями люкаськиз. Гуртоосмы понна самодеятельной артистъёслэн тыршеменызы 21 номер дасяны быгатӥмы. 28 артистъёсмы концертэз возьматонэ пыриськизы, соос пӧлын нылпи садэ, школае ветлӥсьёс, студентъёс но бадӟымъёс вань вал. Учкисьёсмы но ӧжыт ӧз луэ. Концертын мобилизовать карем воргоронъёсмылэн анайёссылы, праздникен ӟечкыласа, кузьымъёс сётӥмы, берлогес чаен куноямы. Та понна «Борнак» обществолэн кивалтӥсезлы Назипов Рафкат Накиповичлы тау кареммы потэ, котькуд ужрадэз радъяны юрттэ. Артистъёсмы но туж устоесь, соостэк мон нокыӵе ужрадэз радъяны ӧй быгатысал.

— Зэмзэ но, гурт калыклэн юрттэмезтэк нокыӵе ужез радъяны уг луы. Но со сяна, клубын умой аппаратура но артистъёс понна ӟеч костюмъёс, пыдкутчанъёс но луыны кулэ. Та ласянь шуг-секытъёсты ӧвӧл-а?

— Жаляса вераны кулэ, асьмелэн аппаратурамы ӧй вал, микрофонмы гинэ но. Концертъёс яке кыӵе ке ужрадъёс ортчытыку, Бурнакысь нуллӥсько вал. Али кемалась ӧвӧл Тагашурысь клубез ворсазы, отысь аппаратураез милемлы вайизы. Нош дӥськутъёс но пыдкутчанъёс ласянь шуг-секытъёсмы ӧвӧл. Малы ке шуоно милям асьмелэн юрттӥсьмы вань — Вятской Поляна городысь Галина Степановна нимо кышномурт. Ми соин «Чакара» фестивальын тодматскимы. Коллективмылэн выступать карыны пыдкутчанъёсыз ӧвӧл шуыса тодэмез бере, со милемлы 100 сюрс манет уксё сётӥз. Со коньдонэн ми нылкышноослы 10 пар ботинка, 10 пар туфли вурытӥмы, тӧдьы кышетъёс, сценической шторка басьтӥмы. «Борнак» возёслэсь но юрттэтсэ шӧдӥськом. Рафкат Накиповичлэн сюлмаськемезлы луыса милям асьмелэн сценической дэремъёсмы но вань.

— Озьыен, аппаратура ласянь но, дӥськут-пыдкутчан ласянь но кулэяськонъёсты ӧвӧл ни. Гуртады мызганчи шедьтонды гинэ кылиз на — котьма шуид ке но, гуртын соостэк секыт…

— Шонер, гуртын мызганчитэк туж секыт. Удмурт калык азьло дырысен мызганлэн задор гуръёсыз улсын юмшаны туж яратэм, али но со сяммы ӧз ышы. Яра али Вуж Кушкет гуртысь музганчи Алексей Павлов юрттэ — кыӵе ужрадэ гинэ сое эн ӧтьы, котьку но со вуэ, ноку но отказ уг сёты. Сизнер гуртысь егит пияш Артём Антонов но, куремез кылзыса, ужрадъёсамы лыктылэ. Кыкназы ик мызганэн туж умой шудо. Тау соослы. Сыӵе юрттӥсьёсмы вань дыръя, клубмылэн ваньмыз умой луоз шуыса оскисько! 

— Вераськемды понна тау, Ирина Николаевна! Ужады азинсконъёс, выль вормонъёс но кысӥсьтэм мылкыд сӥзисько!

Вераськиз Наталья Жукова

Вуж Турья гуртысь клуб 1984-тӥ арын пуктэмын. 100 муртэз тэрытӥсь юрт вужмемын, солы капитальной ремон карымон но ӧвӧл вылэм ини — выль юрт лэсьтоно. 2021-тӥ арын клублэсь вить укнозэ воштӥллям, но гуртын улӥсьёс оско, ӝоген клубзэс копак выльдыны быгатозы шуыса.