Хезмәт

Дмитрий Бушмакин Балтась ёросысь удмуртъёсын тодматскиз (фото)

Кылем арняе потэм статьяелэн героез Удмуртиысь Дмитрий Бушмакин луиз. Газет пятницае лыдӟисьёс доры вуиз ке, Дмитрий ачиз но пятницае ӝыт асьме ёросамы вал ини. Одӥг уйзэ Балтасьын кӧлӥз но мукет нуналаз Ципьяе пумиськонэ вуиз. Татын сое школаын витизы.

Заочно гинэ тодматскыса но, Дмитрий сярысь таӵе малпан кылдэм вал: со каньыл но визьмо, вераськись но лякыт. Пумиськем бере соку ик валамон луиз: со туж каньыл но туж визьмо, туж вераськись но туж лякыт.

Нырысь пумиськонмы черк дорын луиз. Пумитам велосипед питранъёсты каллен бергатыса, пальпотыса лыктӥсь пиосмурт Дмитрий луэ шуыса соку ик валай. Кема вераськыса ӧм вуэ: кыкнамы но возьдаськимы-а мар-а нырысь, школае но дыртӥмы — отын милемыз школьникъёс витё вал ни.

Школа администрация урамысен Дмитриез бадӟым куноез кадь пумитаз, нош та дыре школьникъёс актовой залысь укноостӥ йыръёссэс поттыса учкизы. «Витиллям вылэм монэ», — пальпотонзэ ватытэк вера Дмитрий.

Актовой залэ пыремен валче кужмо кичабонъёсын пумитамзы бере ини Дмитрий огдырлы кытчы пырыны но ёрмиз кадь — шӧдске, таӵе шуныт пумиталозы шуыса со малпамтэ но. «Ӟечбур, ӟечбур», — шуэ со нырысь возьдаськысагес. Собере ини, ассэ кияз кутыса, воксё сюлмаськемзэ возьматытэк, веранзэ кутске. Валамон, туннэ нуналлы куинь сюрс иськем сюрес ортчем велосипедистлэн трос верано кылъёсыз люкаськиллям шуыса. Путешествиезлэн ужпумез но солэн туж тунсыко — пӧртэм улосъёсысь удмуртъёсын тодматскон но соосты огазеян, удмуртъёслэсь бадӟым но паськыт географизэс возьматон. Та сярысь ик аслаз выступленияз но школьникъёслы но дышетскисьёслы вераз Дмитрий. Синзэс басьтытэк кылзӥськем дышетскисьёс верасьлы пумтэм трос юанъёс сётъязы. «Кытын тӥледлы удмуртъёс тужгес кельшизы?», «Малы путешествие радъяны малпады?», «Уйин кытын изиськоды?» выллем юанъёс трос сётъязы, пиослы нош тунсыко вал кыӵе маркаё велосипедэз Дмитрийлэн. Ваньзылы ответ сётыны быгатӥз со.

Татарстанын Дималы туж кельшем — татын, пе, мукет улосъёсын ӵошатыса, инкуазь чылкытгес. Ма, адямиосыз но, пе, паймымонэзь. Школаысь кошкеммы бере ини Дима шумпотон паймемзэ ватытэк вераз:

— Мон ӧй но малпа, дышетскисьёс но дышетӥсьёс сыӵе активно вераськонэ пыриськозы шуыса. Соослы тунсыко вал ваньзэ тодыны, — шуэ со.

Ини берлогес, ми дорын шутэтскыса пукыкуз, интернетэ пыриз гинэ но Дима серекъяса вера: «Учкы-ай, школаысь дышетскисьёс ини монэным «Контактысь» шедьтыса эшъяськыны малпало ни.

Но школьникъёсын гинэ ӧвӧл, одӥг нунал куспын Дима НКА «Кенешлэн» правлениезлэн членэныз, Сырья клублэн заведующиеныз Леонид Сапожниковен но тодматскыса вутскиз. Вераны кулэ, ӵапак Леонид Дмитриевич вакчи дыр куспын школьникъёсын пумиськон но радъяз, со понна солы бадӟым тау. Кыкназы пиосмуртъёс кӧня ке час ӵоже вераськизы: Леонид Дмитриевич Дмитрийлэсь путешествиын кылдэм мылкыдъёсыз сярысь юалляськиз, нош Дималэн Балтась удмуртъёслэн историзы, улонзы сярысь тодэмез потӥз.

Ђытаз Дима велосипедаз пуксьыса кошкиз — со сюрессэ дор палаз кутӥз, Удмуртие. Мылкыдъёсы кемалы кылёзы на солэн визьмо вераськемез, син азьын луоз солэн котькуд юанлы пыр-поч малпаса валэктон сётэмез. Но Дима вуонояз выльысь пумиськомы шуыса  оскытӥз — сокем ми соин одӥг нунал куспын эшъяськимы. Нош пумиськытозь... Интернетысь асьме палась удмуртъёс сярысь Дималэсь гожъям мылкыдъёссэ лыдӟо (бертыса вуэм бере одно ик «ВКонтакте» вотэсбамысь страницаям гожто шуыса вераз).

Реклама
Нравится
Поделиться:
Реклама
Комментарии (0)
Осталось символов: