Дышетӥсьлэсь нимзэ данэн нуллӥсьёс (4-тӥ люкет)

Зоя Мироновналэн кыкетӥ кенэзлы, Наталья Юрьевналы, дышетон удыс школаын дышетскыкуз ик матын луэм: анаез но, Васильева Антонида Гурьяновна, дышетӥсь луэм бере, Наталья аслэсьтыз вуоно ӧнерзэ кема бырйымтэ.

— 9-тӥ классэз йылпумъяме бере, Можгаысь педагогикая колледже ӟуч кылъя но литературая дышетӥсьлы дышетскыны пыри. Отын аслам анае но ас дыраз тодон-валан басьтӥз, ӵыжы-выжыосмы но городын вал. Со сяна, асьмеос удмуртъёс бере, тыршимы Удмуртие дышетскыны пырыны, удмуртъёс пала кыстӥськимы, — Можгае вуэмез сярысь вера Наталья Юрьевна. — Эшъёсын ӵош дышетскыны пырыса, валче тодон-валан басьтӥмы, доре бертон сюресмы но огазе ветлыса сокем кузь уг поты вал.

Кӧня ке ар талэсь азьло Казаньын вылӥ тодон-валан басьтэ ке но, Наталья Юрьевна уг ваты: самой бадӟым опытсэ со Можгаысь колледжын дышетскыкуз басьтэ. Со дышетскон интыен герӟаськемын самой шуныт тодэ ваёнъёсыз, отын со басьтэм номаин воштонтэм опыт но практика.

Наталья Юрьевна тодон-валан басьтэмез бере ик ӧнерезъя ужаны уг кутскы: Ижевскысь одӥгаз нылпи садын тырше. Берлогес Ципьяысь школае ужаны интыяське, нош собере — Казане кошке. Отын но ньыль ар ӵоже нылпи садын тырше. 2013-тӥ арысен Казаньысь 69-тӥ номеро школаын покчи классъёсты дышетыны кутске.

— Мон нылпиосты котьку яратӥ, соин уже но котьку соосын герӟаськиз: нылпи садын ужакум но, али школаын тыршыкум но. Дышетӥсьлэн ӧнерез капчиос пӧлысь ӧвӧл, зэм. Но мыным та уж котьку туж кельшиз. Нылпиосты яратӥд ке, соосты валаны тыршид ке — соос но тонэ яратозы. Нылпиос луо пӧртэмесь, висись пиналъёс но вань — тае но лыдэ басьтыны кулэ, чиданы, валаны кулэ нылпиосты. Но ваньмызлэсь эсэпсэ (мера) но тодоно.

Чидан сярысь Наталья Юрьевна трос тодэ — дас ар ӵоже городысь школаын ужаса со пӧртэм нылпиосты адӟем (нялтас вераса, классаз 36 кузя нылпиосыз но луэм ини солэн), трос анай-атайёсын ужам. Но ужзэ кельтыса ассэ мукет интыын эскерыны солэн ноку малпанъёсыз луымтэ, дышетон удысын со — аслаз интыяз.

— Нылпиосын ӧвӧл, анай-атайёсын ужаны секытгес луэ арысь аре, — вера дышетӥсь. —  Но кулэезъя ужад ке, соосын но огъя кыл шедьтыны секыт ӧвӧл. Син медаз усьы, дасэтӥ арзэ ужасько ини, та дырозь конфликтъёсы пыреммы ӧвӧл.

Валче ужано коллективзэ но Наталья Юрьевна туж яратэ, котьма ласянь юрттыны, поддержать карыны быгатэ шуэ.

Дышетӥсьлэн мыло-кыдо дышетскисьёсыз но ӧжыт ӧвӧл, соос арлы быдэ, город, ёрос конкурсъёсы, олимпиадаосы пыриськыса, призо интыосты басьто. Та Наталья Юрьевнаез туж шумпоттэ.

— Грамотаос но пӧртэм вормонъёс ужмылэсь ӟечлыксэ возьмато, зэм. Но дышетӥсь кагазъёс понна ӧвӧл, нылпиос понна ужакуз зэмос дышетӥсь шуыса нимаськыны быгатэ. Быгатӥд ке тыныд оскем пичи нылпилы тодон-валан сюресэ вамыш лэсьтыны юрттыны, дышетӥд ке сое ӟечезлы но пиналэз дышетсконэн тунсыкъяськытыны пӧрмытӥд ке — соку астэ дышетӥсь шуыны быгатӥськод, — йылпумъя дышетӥсь.

Наталья Юрьевналэн та верамезлы Ермолаевъёслэн семьяысьтызы котькуд дышетӥсь тупа: Зоя Мироновна но, Ольга Анатольевна но, Таисия Анатольевна но, ачиз Наталья Юрьевна но. Трос кужымзэс сётӥзы но сёто соос нылпиослэн ӟечлыко тодон-валанзы мед луоз шуыса. Дырзэс жалятэк, куддыр асьсэлэн нылпиоссы сярысь вунэтыса, адямилэн нылпиосыз понна нуналысь нуналэ ужало. Дышетӥсьлэсь нимзэ данэн нуллэмды понна тау!