«Котькуд вурем дӥськутэ кузёезлы мед кельшоз шуыса тыршисько»

Шӧдӥды-а тӥ, берло дыре адямиос калык шӧмо дӥськутъёсын тросгес тунсыкъяськыны кутскизы шуыса? Кышномуртъёс, кылсярысь, удмурт дэремзы ӧвӧл ке но, «Гырон быдтон» празднике яке мукет кыӵе ке удмуртлыкен герӟаськем ужрадэ, дӥськутсэс кыӵе ке удмурт луэмзэс пусйись элементэн чеберманы тыршо — монистаен, пельугыен, чыртывесен.

Сыӵе тенденция Удмуртиын гинэ ӧвӧл, Татарстанын но шӧдӥське (пӧртэм ужрадъёсы ветлэмысь, трос адямиосын тодматскемысь, ма сярысь верамме тодӥсько). Талы шумпотыны гинэ луэ. Эшшо но шумпотымон, асьме ёросамы но удмурт шӧмо чеберъянъёс, дӥськутъёсты вурись усто кышномуртъёс вань шуыса.

Одӥгез соос пӧлысь — Ципья гуртысь вуриськись Ольга Кумаева. Гуртын интыяськем ательеяз клиентъёсыз солэн трос — ужез умой мынэ. Кыӵе арбериосты со туннэ нуналэ вуре, кызьы удмурт дэремъёсты вурыны кутскиз, маиз солы аслаз ужаз тужгес тунсыко потэ — та сярысь Ольга Витальевнаен интервьюын. 

— Ольга Витальевна, туннэ лыдӟисьёсмы тӥледыз умой тодо, дыр, шуыса малпасько. Но соос уг тодо, ку но малы тӥ вуриськон удысэн тунсыкъяськыны кутскиды. Нырысь ик со сярысь ӧжытак вералэ вал.

— Вуриськон машинаен мон пичи дырысеным тодмо. Малы ке шуоно семьяямы вуриськисьёс трос — анае но, ӵужанае но, песяе но. Вань матысь кышномуртъёсы вуриськизы бере, мынам та удысэн тунсыкъяськыны кутскемелы паймонэз но ӧвӧл, дыр, ини. Бадӟым будэмея, киы волямъя мон но соослы юрттыны кутски. Тӥни озьы 7-тӥ классысен вуриськон мынам хоббилы пӧрмиз. Та уж кельшемысь, улонме но та удысэн герӟаны малпай — школа бере Йошкар-Олаысь технологической колледже дышетскыны пыри. Сое 2011-тӥ арын йылпумъяса, 4-тӥ разрядэн портнойлэсь, модель-конструкторлэсь ӧнерзэ басьтӥ.

— Ципья гуртын асьтэлэн ательеды 2019-тӥ арын усьтӥськиз шуыса тодӥсько. Ужды ма бордысен кутскиз? Секыт вал-а ваньзэ выльысен кутскыны, клиентъёсты люканы?

— Ӧнер басьтэме бере 8 арскын гинэ ательеме усьтӥ ке но, колледжын люкам тодон-валанъёсты мон ӧй вунэты. Дорам заказъёсын ӧй выры, но вуриськонэз ноку ӧй кушты — пичияк аслым, матысьёсылы кулэ луись арбериосты вурылӥ. Ательеме усьтэме бере но нырысь бадӟым ужъёс борды басьтӥськыны ӧй дӥсьты — дӥськутъёсты ремонт карон ласянь ужъёсын тросгес выри: вакчиятӥ, вандылӥ. Ӧжыт опыт люкаме бере, бадӟым заказъёс бордын но ужаны кутски ни. Капчи ӧй вал, мазэ веранэз. Семьяелы, кузпалэлы тау, соос юрттӥзы. Дыр ортчыса, адямиос тросгес но тросгес ветлыны кутскизы.

— Туннэ нуналэ тӥледлы кыӵе заказъёсын вазиськыны луэ?

— Дэремъёс, костюмъёс, штораос, тюльёс, трикотажной изделиос, нылпиос понна дӥськутъёс — туннэ нуналэ ваньзэ вурисько. Камалиос лэсьтон понна инъетъёс (основаос) но дасясько. Кельше мыным сыӵе калык дӥськутъёсын, арбериосын вырыны.

— Ёросын тӥледыз ӵапак калык дӥськутъёсты усто вурисез кадь но тодо. Асьтэлэн вотэсбамдылы осконо ке, туж чебер вуриськоды нылпиос понна бигер, пор но мукет чебер калык костюмъёсты. Тужгес трос соос пӧлын удмурт костюмъёс. Та ужен вырыны ку но кызьы малпанды кылдӥз?

— Калык костюмъёсын куинь ар ӵоже вырисько ни. Та уже кутскиз вашкала дэремъёсты выльдон бордысен, одӥг кышномурт куриз солэсь валляна дэремзэ выльдыны, мон соглаш луи. Мыным та уж сокем кельшиз но тунсыко потӥз, собере ачим но вурыны кутски ини. Шонерзэ вераса, вылез борды басьтӥськыны котьку кышкыт, но со дыре ик тунсыко но. Шумпотӥсько, калыклы мынам вурем дӥськутъёсы кельшо шуыса. Бен, али мон тросгес садике ветлӥсь но школаын дышетскись нылпиос понна туала удмурт дэремъёсты вурисько. Дышетӥсьёссы но визьнодасьёссы мыным вазисько, нош мон, соослэсь малпанъёссэс но эскизъёссэс лыдэ басьтыса, аслэсьтым ӵектонъёсме сётыса, уж борды кутскисько. Умой пӧрме кадь.

— Удмурт калык дэремъёсты вурон понна материал шедьтыны туж секыт, дыр.

— Секыт. Асьме палан сыӵе материал шедьтыны уз но луы, дыр. Удмуртиысь гинэ заказать карид ке. Соин мон, удмурт калык дэрем вурыны курыкузы, адямиосты материалэн лыктыны косӥсько. Нош туала сценической дэремъёс сярысь верано ке, нокыӵе шуг-секытъёс уг кылдо — Балтасьысь гинэ но материал басьтыны луэ. Соос али туж трос но пӧртэмесь.

— Ёрослэн палэнысьтыз дӥськут вурыны курыса вазиськисьёсты вань-а? Вазиськисьёс пӧлын воргоронъёс но пумиськыло-а?

— Вазиськисьёс ваньзы шуымон асьме ёросысь гуртъёсысь — удмуртъёсысьтыз но, бигеръёсысьтыз но. Киров улосысь вазиськись песянай но луиз, солы удмурт дэрем вуриськем вал. Шонерзэ верано ке, мон туннэ нуналэ пӧртэм адямиосын ужаны быгатӥсько — бадӟымъёсын но нылпиосын, кышномуртъёсын но воргоронъёсын. Но воргоронъёслы шер гинэ мар ке вурылэме вань.

— Асьтэлы кыӵе дӥськут тросгес вурыны кельше?

— Котькуд заказ борды индивидуально басьтӥськисько, кылкутонэн. Мед луоз со воргорон дӥськут, кудӥныз мон шер вырисько, яке кышномурт но нылпи дэрем, кудъёсыныз мон нуналлы быдэ ужасько. Вылаз ик котькуд дӥськутлэн но вурон технологиез одӥг кадь ук. Вурем котькуд дӥськутэ кузёезлы мед кельшоз шуыса тыршисько, сыӵе девизэн ужасько мон. Аслым тужгес кельше удмурт дӥськутъёсты вурыны. Тунсыко уж со мон понна.

— Тунсыко ке но, удмурт дэремез вурыку, шонер вурон технологиоссэ тодыны кулэ. Пӧрме-а котьку шонер технологиосъя вурыны?

— Капчи уг луы ке но, мон тыршисько шонер вурон технологиосъя ужаны. Но асьме ёросысь удмурт гуртъёсын гинэ но удмурт дэремъёсты вурон технологиос висъясько. Кылсярысь, Починка гуртын, Ципьяен ӵошатыса, со мукетгес. Карлыганын но дӥськутсы висъяське. Соин мон заказчикен кенешыса гинэ таӵе уж борды кутскисько. Али интернетын но туж трос туала сценической дэремъёс шедьтыны луэ — пӧртэм фасонэн, пӧртэм тусо. Котькудӥз соос пӧлысь чебер но аспӧртэмлыко.

— Ольга Витальевна, ательеяды ужам сяна, тӥ Балтасьысь трос профильем центрын но ужаськоды ук али. Со сярысь но ӧжытак вералэ вал. Пӧрме-а котьку ужаны кужым но мылкыд шедьтыны?

— Озьы, кыкетӥ арзэ ини Балтасьысь трос профильем центрын вуриськисьлэсь курсъёссэ ортчытӥсько, кышномуртъёсты вуриськон дуннеен тодматӥсько. Арняяз одӥг-кык пол занятиосмы ортчо. Туннэ нуналэ ини витетӥ группаеным ужасько. Туж шумпотӥсько, нылкышноослы вуриськыны дышетскыны юрттӥсько шуыса, эшшо но мылкыды ӝутске соослэсь таукарон кылъёссэс кылыкум. Валамон, жадён дыръёс котькинлэн луо. Но куке ужедлэсь бервылзэ адӟиськод, азьланяз ужаны эшшо но бадӟым стимул луэ. Заказъёсты дыраз вуттымтэ вакытъёс но куддыръя луо, яра али адямиос йӧноесь, валасесь. Со ласянь нокыӵе шуг-секытъёс ӧвӧл, шумпотымон. Сыӵе дыръя тыршыса, сюлмез сётыса ужаме потэ. Котьку но озьы мед луысал...

— Туннэ нуналэ кадь ик, ужды котьку пайда но шумпотон мед ваёз, Ольга Витальевна! Удмуртлыкез утёнын бадӟым уж лэсьтӥськоды. Тау!

Вераськиз Наталья Жукова