Хезмәт

Кунолэн но куно каремъёслэн пумиськонлэсь кылем мылкыдъёссы

"Мон дыртӥ Балтась районэ, отчы пыраны мыным ӵектӥз вал Александр Ожмеков но озьы ик ӧтиз вал Наталья Жукова. Балтась дорозь 28 иськем кыльыку, мон ӧй тоды на кытчы дугдыны"

Дмитрий Бушмакин:

— Москваысен уйпал Татарстан дорозь мон, кызьы ке но озьы луиз, Санкт-Петербургысен асьме столицамы дорозь сярысь, ӝоггес вуи. Соку ик монэ туж шумпоттӥз инкуазь. Мон дыртӥ Балтась районэ, отчы пыраны мыным ӵектӥз вал Александр Ожмеков но озьы ик ӧтиз вал Наталья Жукова. Балтась дорозь 28 иськем кыльыку, мон ӧй тоды на кытчы дугдыны. Дыр нуназе куинь час котыр вал. Посёлок дорозь пеймыт усьытозь мон вуыны быгатысал на, но ӧй тоды, вите-а монэ отын кин ке. Тани ӵапак куинь часэ Наталья ивортӥз, монэ шумпотыса Дмитрий но Екатерина Плотниковъёслэн семьязы пумиталоз шуыса. Соку мон, ини кӧлыны быръем интыме кельтыса, сюрес вылэ потӥ. Шунды пуксьыку Балтасе вуи. Дмитрий монэ велосипедэн пумитаз но монэ «национальной героен» нимаз. Та ним монэ керпоттӥз, но кельшиз но, путешествиелы кин ке сыӵе дунъет сётэ шуыса. Солэн коркаез дорозь ортчимы посёлоклэн урамъёстӥз, но Балтасез учкыны ӧй быгаты. Адӟем посёлок мыным азинтӥськись но будӥсь инты шуыса потӥз, трос асфальт сюресъёс, светофор но пешеход выжъёс, пандусъёс но тротуаръёс вань — город шуыны луэ. Дмитрий но Екатерина монэ туж огшоры но эшлыко пумитазы, изьыны выдыкум йырам дӥсьтымтэ малпан но кылдӥз: соос доры эшшо кӧня ке нуналлы куное кыльыны, сокем умой но каньыл вал. Ӝытазе ми трос вераськимы мынам путешествие сярысь, удмуртъёслэн Татарстанын улэмзы сярысь, вуоно нуналлы планъёс сярысь (но кӧня ке политика сярысь). Телефон пыр Наталья ивортӥз, ӵуказе 9 часэ ӵукна монэ Ципьяысь школаын бадӟым классъёсын дышетскисьёсын пумиськонэ витё ини шуыса. Но мон кӧня ке бере кыли. Ципья школалэн ӧсъёсыз азьын монэ куинь кылын ӟечкыласа пумитазы! Ӟечбуръяськи но монэ ӧтизы актовой залэ, кудаз зал тыр калык вал. Монэ туж шумпоттӥз, дышетскисьёс зэмзэ но та пумиськонэн тунсыкъяськизы шуыса. Час ӵоже мон вутски путешествие сярысь вераны но кӧня ке юанъёслы ответ сётыны. Монэ нош ик паймытӥз дышетскисьёслэн активной луэмзы, соос дӥсьтыса юанъёс сётъязы но сак кариськыса кылзӥзы валэктонъёсты. Нош куке мон верай Южной Кореяе вуылэме сярысь, котьку сямен кадь, быдэс зал кадь шокчиз. Озьы ик монэ паймытӥз ачиз школа но, кудаз анай кылэз ньыль кылын дышето: бигер, удмурт, пор но ӟуч. Нылпиос куспазы анай кылэнызы верасько! Со нуналэ та мон понна тужгес но шумпотымонэз вал. Собере монэ витиз Леонид Сапожниковен, удмурт культураез утён понна туж активной нюръяськисен, пумиськон. Со аслыз туж юн оскись, ӟырдыт мылкыдо! Соин вераськыкум мон удмурт кыллэсь шошма диалектсэ кылӥ. Со туж синмаськымон, кылыны кызьы воштӥське кыл, та возьматэ, со улэп шуыса. Интыосын, валамон, адямиос сюлмасько, ӟучомон мынэ шуыса, но путешествиын тон кылӥськод кыллэсь воштӥськемзэ но кылдэ малпан, кыл улоз шуыса. Дышетскисьёс но мукет национальной школаосы куное ветлыны мед быгатысалзы вылэм, удмурт кыллэсь диалектъёссэ кылыны. Та кылэн тунсыкъяськыны, соин вераськыны муг луысал! Леонид возьматӥз мыным трос аръем ужезлэсь йылпумъянзэ — «Песни, танцы и игры шошминских удмуртов» книгазэ. Та Татарстанысь удмуртъёслэн фольклоренызы кык томъем сборник. Мон но та книгаез шумпотыса лыдӟысал! Отын XIX-тӥ даурысь кырӟанъёс но вань! Туж жаль, со сборник опубликовать каремын ӧвӧл али. Мылкыды сӧриськиз, музеез адӟыны ӧй быгаты шуыса, шошма удмуртъёслэн культуразылэн улонысь арбериосын тодматскыны. Но та нырысь ик путешествие амалэным герӟаськемын, мон уг быгатӥськы азьвыл ик вуон дырме вераны, уг быгатӥськы адямиосын герӟаськыны. Соин мон юнмай малпанам, Ципьяе одно ик эшшо лыкто шуыса.

Димаез куное пыртэммы ми понна витьымтэ ужрад луиз. Сыӵе аспӧртэмлыко путешествие потэм адями сярысь кылэммы бере, соин соку ик тунсыкъяськимы. Балтасьын «перевалочной пунктэз» ми  дорын мед луоз шуыса, малпамы — та палан уйпал Удмуртиысь улосчи адямиен пумиськыны туж ик ӵем уг кылдылы (ачим но уйпал удмурт луисько ук). Уж бере дыртыса-дыртыса дасяно сиёнъёс пӧзьыса вуымтэ но на вал, куке куномы лыктыса вуиз. Ми дорын кӧня ке час шуымон гинэ улӥз ке но, со милемлы матын но дуно луиз. Нырысь пыремез бере ик кемалась тодмо мурт кадь потӥз, агай-вынэд лыктӥз, оло. Зэмзэ ке верано, туж ик шонер но ӧм каре, дыр — жадьыса лыктэм муртлы ӧс выжыысен ик юанъёс сётъяны кутскимы. Нош соос пумтэм трос вал. «Эн паймы ини, ваньзэ юаса ум вуттэ шуыса кышкаськом», — серекъяса шуимы ми солы. Но сыӵе каньыл, туж лякыт мурт номыр пумит ӧз но вера. Котькуд юанлы со пыр-поч малпаськыса валэктон сётӥз. Та вакчи часъёс ӵоже гинэ но Дималэсь трос тодӥсь луэмзэ валамы, котьма сярысь кутскем вераськонэз нуыны быгатэмзэ шӧдӥмы.

Пӧзьтэм сиён сиыса, мунчое пырыса, шӧдтэк шорысь вуэм путешественникмы ӧжыт ке но шутэтскиз шуыса оскиськом, кылем сюресэзлы кужым люказ. Вазь ӵукна султыса, матысь но оскымон эшеныз, велосипедэныз, ӵош со выльысь сюрес вылэ потӥз. Кошкемезлэсь азьло туспуктэме усимы, сюрес вылын ваньзэ умойзэ сӥзьыса келямы, Удмуртилы салам но азьпалан нош пумиськонмылы осконмес верамы.

Ини корка пыреммы бере, адями уг тырмы кадь но потӥз милемлы, ӵапак матысь муртэд, ӵыжы-выжыед кошкем бере выллем.

«Дмитрий кадь адямиосын сокем ӵем тодматскыны уг луы. Со аслаз примереныз милемлы возьматӥз, кыӵе кышкасьтэм, дӥсьтӥсь луыны быгатэ адями. Со кадь велосипедэн путешествие кышкатэк потыны быгатӥсьёс ми пӧлын воксё ӧвӧл, дыр. Нош со милемлы возьматӥз, трос коньдон луытэк но бадӟым сюрес вылэ потыны луэ шуыса. Соин но пумиськон ми понна но, дышетскисьёс понна но туж пайдаё луиз. Нырысь возьдаськыса вераськыны кутскись Дмитрий берло ини пальпотыса котькуд юанлы пыр-поч ответ сётыны быгатӥз, соин но со дышетскисьёслы кельшем, дыр — юанъёссы быдмонтэм трос луизы. Али Дмитрий таза улон сямен гинэ уг улы, удмуртъёслэн улонэнызы но тунсыкъяське, таиз но ми понна туж шумпотымон луиз, малы ке шуоно Ципья школаын трос удмурт дышетскисьёс вань. Ма, удмуртъёслы гинэ ӧвӧл, ваньзылы тунсыко вал — Дмитрийлы юанъёс бигеръёс но, ӟучъёс но сётъязы. Кошкыкуз нош Димаез ураме потыса ик келязы, али соин селфи карыса но вутскизы. Оскиськом, Дмитрийлы но милемын тодматскон, асьмепал удмуртъёслэсь улонзэс кылыны гинэ тодон ӧвӧл — адӟон — пайдаё но тунсыко луиз, дыр, шуыса».

Реклама
Нравится
Поделиться:
Реклама
Комментарии (0)
Осталось символов: