Мынам яратоно дышетӥсе

Школаын одӥгез тужгес гажано но яратоно дышетӥсьмы — удмурт кылъя но литературая дышетӥсь Петрова Римма Николаевна. Со милемлы, дышетскисьёсызлы, аслэсьтыз вань тодон-валанзэ гинэ ӧвӧл – сюлэмзэ сётыны тырше. Мон солы, солэн тыршись луэмезлы синмаськисько. Та дышетӥсьлэн ӟеч сямъёсыз сярысь трос но кема вераны луэ.

Ӟаны шоръёзо школалэн выпускницаез луись Римма Николаевна, УдГУ-ысь кылосбуръя (филологияя) факультетэз йылпумъяса, ини 30 арлы матэ аслаз дышетскем школаяз ужа. Римма Николаевна тодаз вае:

— Пичи дыръям мынам почтальон луэме потэ вал. Мынам апае кӧня ке толэзь ӵоже почтаын ужаз. Со дыре газетъёслы трос гожтӥськылӥзы, нош почта ящикъёс ӧй вал. Соин почтальонъёс гурт кузя котькуд корка газетъёсты сётъяса ветлӥзы, мон но апаелы юрттылӥ.

Тунсыкъяськыса газет-журналъёсты лыдӟылӥ. Асьмеос но «Кенеш» журналлы гожтӥськиськомы вал. Эшъёсыным «Шудон коркаен» шудыку но, мон почтальонлэсь ужзэ «азьланьтӥ».

Дышетӥсь луон мылкыд вордскем кылме яратэмысь кылдӥз. Школаын дышетскыкум, удмурт кылъя но литературая урокъёсты Захарова Вера Федотовна нуэ вал. Со туж визьмо, тыршись но йӧно дышетӥсь вал. Вера Федотовна милемыз удмурт кырӟанъёсты кырӟаны дышетӥз, куд-огъёссэ мон али ке но тодӥсько. Ми ӵемысь концертъёсын выступать каримы, гуртъёсы спектакльёсын но концертъёсын поталлямы. Бадӟым классъёсын удмурт кылъя но литературая урокъёсты Николаева Мария Петровна нуиз. Ӵапак со милемлы, классысьтымы нылъёслы, УдГУ-э пырыны ӵектӥз. Озьы тӥни ми, вить нылъёс, ӵош Ижкаре кошкимы. Пӧлысьтымы куинез дышетскыны пыризы: Исаева Наталья Юрьевна, Хомякова Юлия Михайловна но мон.

— Кыӵе, Тӥляд малпамдыя, луыны кулэ дышетӥсь?

— Мынам малпамея, дышетӥсь ӟеч сюлэмо, юрттыны дась луись, данзэ валась, лякыт сямо, визьмо, азяз пуктэм ужпумъёссэ быдэстыны тыршись но зэмлыко луыны кулэ шуыса.

— Асьтэлэсь нырысетӥ уроктэс тодӥськоды на-а? Кыӵе вал соку Тӥляд мылкыдъёсты?

— Мынам нырысетӥ уроке вал 7-тӥ классын литературая урок. Мон туж тыршыса солы дасяськи, трос лыдӟи, мар вераны кулэ йырам кельтӥ.

— Дышетӥсь луыны капчи-а? Та ӧнерлэсь кыӵе шуг-секытъёссэ вормыны секытгес?

— Мон малпасько, дышетӥсь понна самой секытэз — дышетскисьёсын огъя кыл шедьтон. Соослы тодон-валан гинэ сётоно ӧвӧл, кылкутыны быгатӥсь луыны, озьы ик ӟечезлы но дышетоно.

— Дышетскисьёстылэн кыӵе сямъёссы Тӥледлы кельшо?

— Огъя вераса, вань адямиослэсь мон шонерлыко но зэмлыко луэмзэс дунъясько. Дышетскись нош чылкыт но ӟеч сюлмо, ужась, тыршись, пуктэм ужпумзэ быдэстыны сюлмаськись луыны кулэ.

— Нош Тӥляд асьтэлэн дышетскисьёстылэсь малы ке но дышетскемды уг поты-а?

— Мон котьку нылпиослэсь малы ке но вылезлы дышетскисько. Кылсярысь, туала гаджетъёсын пайдаяськыны. Аслам классысьтым дышетскисьёсылы тросгес дыр висъяны тыршисько. Мыным тунсыко, маин соос выро, маин тунсыкъясько, кызьы дышетско. Соосын нуналлы быдэ кусып возьыны тыршисько, шутэтскон нуналъёсы но. Туала дышетон удысын мыным кельше, нылпиос асьсэос интернет ресурсъёсын пайдаяськыса, кулэ луись информациез шедьтыны быгато шуыса.

— Кыӵе тужгес кулэ кенеш Тӥ сётысалды дышетскисьёслэн анай-атайёссылы?

— Анай-атайёс школаен, озьы ик классэн кивалтӥсьёсын юн кусып возьыса, соосын кенешыса, огкылэ вуыса улысалзы, буш дырзэс нылпиосынызы ортчытысалзы ке (лыдӟиськыса, прогулкаосы, экскурсиосы ветлыса), туж умой луысал. 

Юлиана Кешишева,

О. Н. Исаев нимо Ӟаны шоръёзо школаысь 10-тӥ классысь дышетскись.

Фото: Р. Петрова