Покчи Лӧзяослэн вормонъёссы – асьмелэн шумпотонмы (+фото)

- 4-тӥ октябре милям коллективмы, «Наш дом – Татарстан» этнокультурной фестивальлэн Арча городын ортчем зональной этапаз пыриськыса, Казаньын Калык огазеяськонлы сӥзем бадӟым ужрадэ – Гала-концертэ – пыриськыны право басьтӥз. Ми понна со туж бадӟым шумпотон но данъяськон вал – Республика уровеньын Балтась удмуртъёсты возьматон», - шуэ «Вуюись» ансамбльлэн художественной кивалтӥсез Галина Денисовна Петрова. Асьме коллективмылы кадь ик сыӵе сӥё-дано ужрадэ пыриськыны шуд усем Менделеевск ёросысь, Елабуга городысь удмурт коллективъёслы но Казаньысь удмурт егитъёслэн «Бурдомурт» ансамбльзылы. Соос ваньзы ӵош одӥг бадӟым сценаын туж чебер композиция кылдытӥллям, учкисьёсты шулдыр выступлениенызы шумпоттӥллям.

- Коллективмы ялан бадӟыма. Туж шумпотымон, выль но выль адямиос, удмурт сям-йылолъёсты, кырӟанъёсты но эктонъёсты яратӥсьёс пӧламы итӥсько. Фольклор ансамбльмылэн вормонъёсыз но шӧдскымон трос ни. Тани, кылсярысь, кемалась ӧвӧл гинэ, 21 октябре, Набережные Челныын ортчем «Мы ветви древа одного» шуэм Татарстанысь финн-угор калыкъёслэн творчествозыя республиканской фестивале нимысьтыз ӧтён басьтыса пыриськимы но дипломен пусйиськимы. Та туж шумпотымон ми понна. Туннэ нуналэ тани 18 ноябре Сосна культура юртын ортчоно «Гурласа мед улоз сцена» шуэм район конкурслы дасяськиськом. Огъя вераса, тэк пукыны дырмы ӧвӧл, улонмы пӧзе, мылкыдмы шулдыр», - шуэ Галина Денисовна.

Зэм но, дырдэ но мылкыддэ ӧд ке жаля, вормонъёсы вутскыны луэ вылэм. Покчи Лӧзяослэн «Вуюись» ансамбльзы талэн зэмос примерез. Азьланяз но азинсконъёс сюресчи мед луозы тӥледлы, «вуюисьёс»!

 Ольга Плотникова.