Сырья кышномуртъёс — усто пӧраськисьёс

Сырья гуртысь кӧня ке пӧраськыны яратӥсь мыло-кыдо кышномуртъёсын тӥледыз но тодматомы. 

Антонида Давыдовалэн кӧжы кисалез туж умой пӧрме

Кӧжы кисаль — удмуртъёслэн одӥгез яратоно сиёнзы. Сое кемалась дырысен асьме калыкмы яратэм — таӵе кисалез дасяны но кема ӧвӧл, кылдытӥсь люкетъёсыз (ингредиентъёсыз) но солэн ӧжыт, вылаз ик туж ческыт но пӧрме.

Кӧжы кисаль — кӧжылэсь дасям сиёнъёсты яратӥсь кузё кышноослэн ӝок вылазы ӵем куно. Кылсярысь, Антонида Давыдовалэн ӝӧк вылысьтыз та сиёнэз матысь адямиосыз ялан адӟо, но соку ик сиыса быдто — анайзы та сиёнэз туж ческыт дася вылэм. Тани ма вера ачиз Тоня апай та сярысь:

— Мон кӧжы кисалез дорын туж ӵем дасясько. Котькуд сиён пӧзьтӥсьлэн вань ук сыӵе сиёнэз, кудзэ со дасяны яратэ, мынам сыӵе сиёнъёслэн одӥгез — кӧжы кисаль. Эшшо дорысьёсы но та сиёнэз туж яратыса сиё, соослы шуыса шумпотыса дасясько. Али кемалась ӧвӧл нылы сьӧры Казане но лэзиськем вал, бигер эшъёсыз «туж ческыт маке вылэм та тӥляд кӧжы кисальды» шуыса сииллям. Мед тодозы, кыӵе ческыт асьме калык сиёнъёсмы.

Тоня апай кӧжы кисальзэ дорысьёсыз понна гинэ ӧвӧл, гуртоосыз понна но котьку шумпотыса дася: со тодэ, кисальзэ веръяса утьыны мылкыд карисьёс трос луозы. Гуртын кыӵе ке ужрад ортчыку, кышномурт кӧжы кисальзэ куноосты сюдон понна нимысьтыз дася. Нош гуртоосыз но куноос солы котьку тау каро.

Кӧжы кисалез дасян понна, Тоня апай нырысь вузэ пӧсятэ, собере отчы сылал ватса. Дугдылытэк вузэ суранъяз пичиен-пичиен кӧжы пызь ватса (600 грамм вулы 200 грамм пызь, нош сылалэз шӧмызъя). Кисаль кизер но луыны кулэ ӧвӧл, нап но. Пӧсеныз ик сое Тоня апай тэркыосы интыя но сӥямезлэсь азьло вылаз кизер вӧй кисьтэ. Солэн верамезъя, яра шуккем вӧй но — кинлы кызьы кельше. Но ачиз со кизер вӧен яратэ вылэм.

Тӥни сыӵе капчи рецепт, нош кыӵе ческыт сиён пӧрме — чиньыдэ ньылод! Кӧжы кисалез трос нылкышноос дасяло но котькудӥзлэн кузё кышнолэн со аспӧртэмлыко шӧмо луэ. Тоня апай нош ческыт рецептэзлэсь одӥг секретсэ вераз: валтӥсез — кӧжы кисалез пӧзьтыку но, мукет сиёнъёсты дасяку кадь ик, лул-сюлэмез поныса дасяно, пе. Соку сиёнэд ческыт пӧрмоз. Тӥни ма!

Лариса Чернова ческыт перепеченыз данъяське

Зэмзэ верано ке, перепеченыз гинэ но ӧвӧл: Лариса апай пӧраськыны туж усто, нош солэсь куно карыны быгатэмзэ быдэс ёросын но, солэн палэназ но тодо. Сотэк Сырьяын одӥг ужрад но уг ортчы. «Гырон быдтонэ» пыриськем адямиос Лариса апайлэсь дасям ческыт но небыт кумышказэ веръятэк уг кошко. Вань технологиосты чакласа пӧзьтэ сое кышномурт, валляна пу аппаратэн. Соин солэн кумышкаез туж умой пӧрме вылэм. 

Лариса апай пӧраськыны но газ плитаын ӧвӧл, гурын тырше. Соин пыжем перепечъёсты тодмоосыз «Пильмон перепеч» гинэ шуо (Пильмон — Черновъёслэн корка нимзы).

— Туж бадӟым гурмы вань, отын пыжиськисько мон. Тужгес яратӥсько картофка перепеч пыжыны, шуэн но пыжылӥсько. Туж яратӥсько нянь пыжыны. Гурын пыжемез тужгес ческыт луэ, — шуэ Лариса апай.

Пыжиськыкуз кышномурт пӧртэм рецептъёсты уте. Но ӵемгес пызяз шуккем вӧй, сылал, сакыр, маял, курегпуз понэ. Озьы, пе, ыльнянь ческыт пӧрме.

Маргарита Семёновалэн табанез буй-буй ӝутске

Та кышномуртэз гуртазы усто табань пыжисез кадь тодо. Кылем арын Сырьяын ортчем гуртлэн нуналаз ужрадэз радъясьёслэсь трос мурт юалляськиз, кин сыӵе ческыт табань пыжиз шуыса. Сое ӵапак Маргарита апай пыжем вал. Табанез солэн небыт но туж ческыт пӧрме.

— Пыжиськыны мон котьку яратӥ, али но ӵемысь пӧраськисько. Тросгес шу, картофка перемеч дасясько. Но гуртоос, зэмзэ но, табаньме туж ярато. Соин гуртамы ортчись праздникъёсы — Йӧвылэпотонэ, гуртлэн нуналаз яке клубын ортчись пӧртэм тунсыко ужрадъёсы — табань дасяса нуисько. Шонерзэ верано ке, милям гуртамы туж мыло-кыдо адямиос уло. Котьку ужрадъёслы но валче дасяськиськом, сиён дасян, пыжиськемъёсты пӧран ласянь но нокыӵе шуг-секытъёс уг кылдо — ваньмы валаськомы: гуртын ог-огедлы юрттыса улоно, ужрадъёсты но валче ортчытъяно — мукет сямен уг луы, — шуэ Маргарита Семёнова.

Табанезлэсь рецептсэ кышномуртлэсь мон гинэ юаськымтэ вылэм ини. Но кызьы шуэ ачиз Рита апай, рецептсэ сётэ ке но, котькуд кузё кышнолэн табанез аспӧртэмлыко шӧмо пӧрме.

Табаньзэ пыжон понна, кышномурт йӧлээз шунтэм вуэн сура вылэм. Собере отчы манной кеньыр ватса, маял понэ. Сакыр, сылал ватсаса сура но пумаз кизер вӧй ватса. Озьы, ыльнянь котэмез бере, солы одӥг час мында «шутэтскыны» дыр кулэ. Собере табанез пыжыны кутскыны луэ.

Мазэ веранэз, туала дыре интернетын но, пӧртэм кулинариен герӟаськем газет-журналъёсын но табаньлэн рецептъёсыз туж но туж трос. Таиз рецепт — Рита апайлэн ческыт табанезлэн рецептэз.

Мар шуид ке но, котькуд усто кузё кышнолэн аслаз сиён пӧзьтон рецептъёсыз, соос трос. Ческыт рецептъёсты сярысь тӥ но милемлы гожтыны быгатӥськоды, гажано лыдӟисьёсмы. Ми шумпотыса рецептъёсыныды мукет лыдӟисьёсмес но тодматомы.