Татьяна Амакова: «Мон асме эмъян удысын шедьтӥ»

Тазалыкез утён удысэ шер гинэ кин ке малпамтэ шорысь шеде, дыр. Эмчи яке эмсузэр луон понна туж трос тодыны, школаын биология но химия предметъёсъя умой дышетскыны кулэ. Та статьяелэн героиняез но покчи классъёсын дышетскыкуз ик тодэм: вуоноын со улонзэ одно ик эмъян удысэн герӟалоз.

Ини соку ик укмыс-дас аресъем нылаш песяезлэсь вандӥськем кизэ эмъяны быгатэм. Вирлэсь но кышкамтэ, яразэ но маин обработать кароно тодэм, бинтэн но валаса-быгатыса ужам. Та учыр солэн тодаз умой возиське на. Эмчи луон сярысь гинэ малпам Татьяна, улонзэ мукет удысэн герӟан сярысь малпанъёсыз солэн луымтэ. Малпанэз быдэсмиз: туннэ нуналэ со — Балтасьысь ӝог эмъюрттэт сётон ёзэтысь фельдшер, нуналлы быдэ адямиослэсь улонзэс утись эмчи.

Фельдшер «Булгариын» изъян басьтэм адямиослы юрттэт сётэм

Больницаын Татьяна Николаевна 2010-тӥ арысен ужа. Нырысь со Казаньысь ӝог эмъюрттэт сётон ёзэтын тыршем, собере Кисаль гуртысь ФАП-ын, Вукогуртын но Вуж Ципья гуртъёсын ужам, нош берло куинь арзэ Балтась больницаысь ӝог эмъюрттэт сётон ёзэтын фельдшер луэ. Татьяна Николаевна тодэ на, кызьы дас куинь ар талэсь азьло нырысетӥ вызовъёсы поталляз. Егит эмчи понна секыт дыръёс луиллям со. Но кивалтэтэз нырысетӥ ужан нуналаз ик валам: та егит ӧнерчилэн ваньмыз пӧрмоз. Малы ке шуоно ужез борды Татьяна Николаевна рос-прос, вань секытсэ но кылкутонзэ валаса кутскем.

Самой тодэ кыльымон учырез нырысетӥ ужан дыръёсызлы ик тупа вылэм. 2011-тӥ арын 10-тӥ пӧсьтолэзе Волга шурын пассажирской судноос пӧлын Россилэн туала историяз тужгес бадӟымез катастрофа луиз — «Булгария» теплоход вуэ выйиз. Улэп кылем адямиосты «Арабелла» круизной теплоход курадӟонъёслэсь мозмытӥз. Ярдуре вуттэм улэп кылем адямиосын ужам ӝог эмъюрттэт сётон ёзэтысь врачъёс но фельдшеръёс пӧлын ӵапак Татьяна Николаевна но луэ. Солэн тодэ ваемезъя, адямиослы соку тросгес психологической юрттэт сётӥзы ке но, та учыр кышномуртлэн тодаз пыраклы кылем. «Куддыръя врачлэн верам кылэз уколлэсь но умойгес эмъя…», — шуэ та сярысь ачиз фельдшер. Нялтас вераса, соку Татьяна Николаевнаез Татарстанысь МЧС «За заслуги» гадьпусэн но пусъем.

Балтасьын фельдшер куинетӥ арзэ ужа

Казаньын ужаны кутскон вакытаз гинэ секыт но сюлмаз кыльымон учыръёсын пумиськымтэ ӧнерчи. Балтасьын ужаны кутскон вакытэз но секыт дыръёслы тупа — 2020-тӥ арын коронавирус висён вӧлме. Со сярысь Татьяна Николаевна тодаз вайыса тани ма вера:

— Нырысетӥ арзэ гинэ ужасько вал али мон соку, коронавирус висён паськыт вӧлмиз. Туж секыт луиз ужаны. Выездной бригадаен нунал куспатыса ӵукна 9 часысен ӝыт 9 часозь ужай. Чидантэм пӧсь нуналъёс, нош ми олокӧня час ӵоже вируслэсь утись нимысьтыз дӥськутмес куштытэк ужамы. Ярам, со ваньмыз ортчемаз кылиз шуыса оскыны кулэ. Али но графикмы капчи ӧвӧл, но со дырен ӵошатыны уг луы ни.

Туннэ нуналэ Татьяна Николаевна кык нунал куспатыса сутка ӵоже ужа. Ӵукна 8 часлы уж дораз лыктэ, рос-прос «скоройлэсь» машиназэ эскере — вань аппаратъёсыз ужало-а, фельдшерлэн чемоданэз кулэ луись эмъюмъёсын но оборудованиосын тырмытэмын-а. Собере компьютер азьын ужа но вызовъёсы потэ.

— Ӝог эмъюрттэт сётон ёзэтын котькуд адями ужаны уз быгаты. Татын физической но, психологической но нагрузка бадӟым, — азьланьтэ веранзэ Татьяна Николаевна. — Котькуд адямилы нимысьтыз подход шедьтыны быгатыны кулэ. Мыным но капчи ӧй вал. Но та удысэз быръеме сярысь мон огпол но ӧй жаля. Адямилы юрттэмме валаса, ӟеч уж лэсьтэмме тодыса тыршисько. Та мон понна туж дуно. Вылаз ик Балтасьысь коллектив туж шуныт пумитаз. Ӝог эмъюрттэт сётон ёзэтамы бадӟым опытэн, визьмо но ас ужзылэн усточиоссы ужало. Соос котьку юрттыны дась. Куинетӥ арзэ тупаса ужаськомы ини.

Балтась ёросын нуналаз ӝог эмъюрттэт сётон ёзэтэз 25 пол но ӧтьыны быгато вылэм…

Праздник нуналъёсы та лыдпус эшшо но бадӟымгес луэ. ОРВИ, ОРЗ висёнъёслэн вӧлмем вакытъёсазы фельдшеръёс тросгес вызовъёсы потало. Висисьёсты Казане, Арчае нуоно луиз ке, фельдшер одно сьӧразы мыноз. Но ӵемысь мӧйы муртъёс доры ветло эмчиос. Арлыдоос вирзӥбетсы вылӥ луэмен курадӟо, инсульт луон учыръёс но соос пӧлын ӵемгес пумисько. Ӵапак фельдшерлэн дыраз шонер диагноз пуктэменыз пациентлэн улонэз но герӟаське.

— Котькуд врач азьын бадӟым кылкутон сылэ. Мед луоз со кабинетын ӵукнаысен ӝытозь пациентъёсты принимать карись эмчи яке мон кадь ӝог эмъюрттэт сётӥсь ёзэтысь фельдшер. Ӵемысь фельдшер вызове огназ вуэ, солэн вӧзаз кенешыны мукет эмчиез но уг луы. Висисьлы дыраз шонер диагноз гинэ пуктыны быгатоно ӧвӧл, сое больницае нуоно-а, ӧвӧл-а, быгатоз-а дораз эмъяськыны, уродгес уз луы-а солы — та сярысь но малпаськоно. Ӟеч, буйгатӥсь кылъёсты но жаляно ӧвӧл, — шуэ Татьяна Николаевна.

Егит ӧнерчилэн Зеленодольскысь медициная училищеын тодон-валан басьтыкуз дышетӥсьёсызлэн верам кенешъёсыз котьку тодаз: адямилы ноку изъян эн вайы, мылкыдъёслы (эмоциослы) но куалектонлы (паникалы) эн сётскы. Татьяна Николаевна котьку та кенешъёсты тодаз возьыса ужаны тырше, куддыръя секыт луэ ке но. Ужан опытэз дас арлэсь тросгес ке но, со али но котькуд уколзэ пуктон азьын ампулазэ кӧня ке пол эскере.

— Эмчилы огдыре юн, кужмо сямо, туж сак но со дыре ик небыт, каньыл но луыны быгатыны кулэ. Котькуд адями сыӵе луыны уг быгаты. Фельдшеръёслы но капчи ӧвӧл. Ми нуналлы быдэ сменаямы «Туннэ мар луоз, кытчы но кин доры мыномы меда» шуыса ужаны потӥськомы. Адямиос но пӧртэмесь луо. Кин ке тышкаське, ужмес уг кельшыты, ӝожтӥськисьёс но вань. Но шумпотымон, сыӵеос ӧжыт. Тросгес адями таукарон кылъёсын вазиське, — ватса кышномурт.

Шумпотон — яратоно      семьяын

Татьяна Николаевна усто фельдшер ке но, нырысь ик со — яратӥсь кузпал но анай. Ачиз кышномурт Карек-Серма гуртысь, картлы кошкиз Тагашуре. Туннэ нуналэ Андрей кузпалэныз Балтасьын уло, кык нылъёссэс — Софияез но Эмилияез — будэто. Соос понна тыршо, ужало.

— Котькуд адями семьяез, матысь адямиосыз вӧзын шутэтске, кужым люка. Мон куддыръя ужысьтым сокем жадьыса бертӥсько, вераськыны но кужыме уг кыльы. Но яратоно нылъёсы, кузпалэ ке вӧзам — вань уродэз сярысь, жадеме сярысь вунэтӥсько. Ужаны выльысь кужым люкасько. Мар шуид ке но, котькуд адямилэн улоназ семья нырысетӥ интыын луыны кулэ. Куке семьяяд ваньмыз умой, ужын но ваньмыз пӧрмоз, — йылпумъя Татьяна Николаевна. — Учырен пайдаяськыса, мынам коллегаосме ӧнер праздникенымы ӟечкыламе потэ. Ужмы секыт, кылкутымон, но со дыре ик адямиослы туж кулэ луись ужъёс пӧлысь. Тае котьку тодамы возьыса, адямиослы юрттыны мед быгатысалмы. Тазалык, шудо-буро улон но ваньзэ-ваньзэ умойзэ!

Шуныт ӟечкыланъёсты ми но эмъян удысын ужасьёсмылы вуттӥськомы. Татьяна Николаевнаез но ваньзэсты тазалыкез утён удысын ужась эмчиосты, эмсузэръёсты ӧнер праздникенызы ӟечкыласа, сӥзиськомы тазалык, каньыл улон, семья шумпотон. Висись пациентъёсты ӧжытгес мед луозы!