Вукогуртъёс выль праздник радъязы (+фото)

Вукогурт калык сярысь мар ке гожъяны кутскыку, ӟучъёс верамъя, «тьфу-тьфу, син медаз усьы» шуыса гожтыны кулэ, лэся, ини. Серекъятэк верасько. Вукогуртъёс зэмзэ но берло ньыль-вить аръёсы туж но туж ушъямон: нокыӵе бадӟым праздникъёсты кельтытэк, вань гуртэнызы чебер ужрадъёсты радъяны быгато — ӟечокъёс. Тани туэ «Выль» праздникез радъязы-ортчытӥзы. Кызьы та праздник ортчиз, лыктэм куноослы кыӵе мылкыдъёс кузьмаз, мар вылез вал дасям ужрадын — гожтэме та сярысь.

«5 гудырикошконэ гурт гужлаз» шуыса гинэ гожтӥд ке, шонер уз луы. Малы ке шуоно праздникез ортчытытозь, ужрадэз радъясьёслы трос нуналъёс ӵоже рос-прос дасяськыны тупаз. Ваньмыз со — гуртооссэс но лыктэм куноосты шумпоттон понна. Тыршемзы юнме луымтэ: ужрадэ пыриськем котьку адями дораз шулдыр мылкыдъёсын бертӥз.

Выль конкурсъёс но шудонъёс тужгес калыклы кельшизы. Кылсярысь, туж усто пӧрмиз вукогуртъёслэн «Тачкаослэн парадзы» конкурссы (нялтас вераса, вукогуртъёс одӥгаз аре гурт праздниказы велосипедъёслэсь парадзэс радъяллям вал ни). Туж паймымон чебер представление вал со! Пӧртэм формаен но быдӟалаен тачкаосты лэсьтыны усто вылэм Вукогурт калык. Та конкурсын 1-тӥ интыен пусйиськиз Григорьев Сергейлэн семьяез, 2-тӥ луиз Кузнецов Николайлэн семьяез, 3-тӥ — Степанов Алексейлэн. Номинациосын пусйиськизы Щербаков Александрлэн но Фёдоров Николайлэн семьяоссы. Мукет шудонъёсы но мыло-кыдо пыриськиз калык. Пу вандон, пуйыосын бызьылон, пуклёен ветлон, чорыган, кузьым вандон, картошкаез горшоке куян, куасэн ветлон, гынсапег куян, ву нуллон но мукетъёсыз — ваньмыз тунсыко но адямиослы кельшымон луиз.

Вань люкаськем калыклэсь мылкыдзэ ӝутыса, ветеран дышетӥсь Туктарова Зоя Фёдоровна праздникен ӟечкылаз, ваньзэ умойзэ сӥзиз но нянь будэтонэ пыриськемъёслы тау кариз.

Кешишев Юрий, Николаев Василий, Яковлев Семён, огазе тыршыса, чебер гур лэсьтӥзы. Степанова Алевтина но Лобанова Галина туж ческыт табань пыжизы, Александрова Рая компот дасяз, нош Григорьева Евгения гуртооссэ чиньыез ньылымон ческыт кӧжы кисален сюдӥз. Ӝук но чай пӧзьтон уже но мукет чыры-пыры ужъёсы трос адями пыриськиз: Степанов Юрий, Степанов Василий, Фёдоров Леонид, Григорьев Сергей, Щербаков Михаил, Щербаков Василий, Андреев Яков, Пашкеев Фёдор, Петров Константин, Кузнецов Николай, Сидоров Юрий, Тимофеев Валерий, Андреев Николай, Степанов Алексей, Андреев Валерий, Перемечев Сергей.

Усто концерт номеръёсын шумпоттӥзы бадӟымъёс но (Фёдоров Николай, Перемечева Марина, Никитина Елена, Кузнецова Римма, Сидорова Лариса, Залкеева Марина, Григорьева Анна, Перемечева Антонида, Никитин Антон), нылпиос но (Григорьева Кристина, Парманова Камилла, Кузнецова Полина, Щербакова Людмила, Фёдоров Алексей, Фёдоров Андрей, Парманов Кирилл, Степанов Станислав, Никитин Лаврентий), егит нылъёс но (Яковлева Карина, Яковлева Софья, Кузнецова Ольга, Чернова Надежда). Мызганэн шудӥз но калыкез шулдыртӥз Зубарев Алексей. Праздникез радъязы Перемечева Антонида но Степанов Юрий, сценариез дасяз Залкеева Марина, нылпиосын концерт номеръёсты дасяз Григорьева Анна. 

Бадӟым уж огъя кужымез поныса, котькуд адямилэн тыршеменыз гинэ умой пӧрме. Вукогуртъёс эшлыко луэмзэс кӧня ке ар ӵоже возьмато ини. Соослы луыса, вукогуртъёс гинэ ӧвӧл, Ципья, Сырья, Карек-Серма но кӧня ке мукет гуртъёсысь вуэм куноос лулысь-сюлмысь шутэтскыны быгатӥзы.