ТР авыл хуҗалыгы һәм азык-төлек министрлыгы: Татарстан кирәк кадәр шикәр һәм май запаслары белән тәэмин ителгән

Татарстан шикәр һәм көнбагыш мае белән кирәкле күләмдә тәэмин ителгән. Бу продукциягә кытлык булмаячак. Бу хакта Татарстан Республикасы Авыл хуҗалыгы һәм азык-төлек министрлыгының матбугат хезмәте хәбәр итте.

«Шикәр белән тәэмин ителеш 356,9% тәшкил итә, ягъни кирәкле күләмнән өч тапкыр күбрәк. Көнбагыш мае буенча һәр татарстанлы 12 тапкырдан артык тәэмин ителгән, тәэмин ителеш – 1269,6%», – дип билгеләп үттеләр министрлыкта.

Ведомствода аңлатуларынча, исәпләү өчен бер кешегә азык-төлек куллануның уртача нормалары алынган. Бу күрсәткечләр бер кешегә 24 кг шикәр комы һәм 12шәр кг май тәшкил итә.

Татарстанда ел саен 331,9 мең тонна шикәр комы җитештерелә, халык ихтыяҗы - 93 мең тонна. Көнбагыш мае җитештерү елына 584 мең тонна тәшкил итә, ә ихтыяҗ – 46 мең тонна.

«Май җитештерү өчен игелә торган культуралар һәм шикәр чөгендере чәчүлекләрен, шулай ук аларны җитештерү күләмнәрен кыскарту планлаштырылмый" ,- дип ышандырдылар матбугат хезмәтендә.

Исегезгә төшерәбез, элегрәк федераль массакүләм мәгълүмат чараларында ваклап сатуда шикәр комы һәм көнбагыш мае белән тәэмин итүдә өзеклекләр барлыкка килде, дигән мәгълүмат таралган иде.

Тулырак: ТИ