Mazda машинасында баручы студент кыз өч баланы таптаткан мизгел видеога эләккән (+видео)

16 июльдә Мәскәүдә 18 яшьлек Валерия Башкирова исемле кыз җәяүлеләр йөри торган юлдан чыгып баручы өч баланы таптаткан. Суд аңа ике айга өй сагы билгеләде. Бу турыда «Вести» каналы хәбәр итте.

Авария мизгелен видеокүзәтү камерасы төшереп алган.

Башкирова Mazda 3 машинасында бара, ул җәяүлеләр чыга торган урында тукталмый, яныннан бара торган машинаны узып китә һәм әти-әнисе белән юлдан чыгып баручы өч баланы бәрдерә.

Биш яшьлек олырак малай самокатта була. Бала комага китә һәм хастаханәдә үлә. Аның баш сөягенең нигезе сынган. Дүрт яшьлек һәм тугыз айлык энесен дә хастаханәгә салганнар, аларның баш мие селкенгән.

Судта билгеле булганча, студент кыз Валерия Башкирова машина йөртү таныклыгын 2020 елда алган.

РЕН ТВ каналы белешмәсе буенча, балалар әбисе һәм әнисе белән юл аша чыгып барган. Биш һәм дүрт яшьлек малайлар икесе дә хастаханәдә вафат булган. Тугыз айлык кыз бала авыр хәлдә хастаханәдә ята.

Авария урынына унлап полиция һәм ашыгыч ярдәм машинасы килгән. Балаларның берсен хастаханәгә вертолет белән алып киткәннәр.

Авария урынына чәчәкләр китерәләр, биредә мемориал барлыкка килгән.

Чыганак: Интертат ; фото: социаль челтәрләр