Юл һәлакәтенә очрап барлык хыяллары чәлперәмә килгән Илназ Мәхмүтовның яңадан тормышка кайту тарихы

Кемнәргәдер ел авыр, мәшәкатьле булып тоелгандыр. Тик язмам героена гына түгел.

…Ноябрьдә сәламәтлеге чикле спортчылар арасында Теләчедә үткән Татарстан беренчелегенә үткән кул көрәше ярышында җиңүчеләр арасында авылдашым Илназ Мәхмүтовны күреп, аеруча сөендем. Күз алдыбызда үскән бу егетнең соңгы ике ел ярым гомере гел көрәштән торса да, сер бирми, сынатмый. 2019 елның 5 августында Балтач – Арча арасында булган коточкыч авариядән соң ул кичергән операцияләрне, реабилитация курсларын, бер адым алга, ике адым артка чигенешләрне, алар белән бәйле кичереш-сызлануларны искә алсаң, егетнең сабырлыгына, ныклыгына сокланып гаҗәпләнә торган.

Хәтерләсәгез, тугызынчы сыйныфны тәмамлагач, укырга керергә документлар тапшырып кайтышлый юл һәлакәтенә очраган Илназ турында  бер язган идек инде. Түләүле ярдәм-курслар күп кирәк чак иде шул, шөкер, көнләп-сәгатьләп катлауланган язмышына битараф калмаучылар бихисап булды. Юкса, авария вакытында Илназда күзгә күренгән бердәнбер җәрәхәт – башындагы яра гына була. Аны теккәч, кинәт эче авырта башлый. УЗИ эчәклекләренә зыян килгән дип күрсәтә. Операциягә керер алдыннан Илназ, аякларымны тоймыйм, ди. Шулай тоела гынадыр дигән өметләр акланмый. Кызганычка, аркасындагы гематома аякларына  зыян китерә… Алга таба исә озак вакыт хәрәкәтсез булган егеткә бер-бер артлы башка диагнозлар да куела: «непроходимость кишечника» дип тә операция ясыйлар, аягында барлыкка килгән тромбларны да дәвалыйлар. Шөкер, әлеге операцияләр уңышлы чыга: 15 килога ябыккан Илназ акрынлап «сафка кайта». Шул көннән инде бүгенгәчә Илназ бер минут хәрәкәтсез тормый дисәң дә, ялгыш булмас. Ул үзе дә, әти-әнисе Илдар белән Альфира да бик тырыша. Һәр мөмкинлекне кулдан ычкындырмыйча, түләүсез һәм түләүле бик күп тернәкләндерү үзәкләрендә булдылар, өйләрендә дә махсус җайланмалар белән туктаусыз шөгыльләнделәр.

– Безгә авыр чакта бик күп кешеләр ярдәм итте. Авылдашлар, танышлар, бер белмәгән кешеләр акчалата да, киңәш-табыш белән дә күп булышты. Газетадагы язма да бик вакытлы булды. Ул чакта югалып калмаска, нык булырга ярдәм иткән һәр кешегә без гомеребез буе рәхмәтле, – ди әнисе Альфира. – Аерым рәхмәтләребез улыбызның дусларына, сыйныфташларына. Алар аны ташламады, ялгыз калдырмады.

…Үткән ел көтмәгәндә бу йорт ишеген районда кул көрәше тренеры булып танылган Фагыйль Гайнетдинов шакый. Илназ белән бушлай шөгыльләнергә теләвен әйтә. Риза булмыймы соң Илназ! Бик теләп, бик тырышып өйрәнә башлый. Беренче нәтиҗәләр озак көттерми: тәүге ярышта ук Татарстан күләмендә беренче урынны ала!

– Россия күләмендә Орел шәһәрендә үткәрелгән ярышка да барган идем, анда ир-атлар арасында көрәшергә туры килде, урын ала алмадым. Быел Татарстан күләмендә Теләчедә үткәрелгән ярышта беренчелекне алдым. Хәзер мин Яңгулга Ранил абый Сафиуллинга тренировкага йөрим. Илкүләм ярышка әзерләнәбез, – ди шушы көннәрдә генә чираттагы дәваланудан кайткан Илназ. Һәм: «Миңа ышаныч күрсәтеп, минем белән шөгыльләнгән Фагыйль абый белән Ранил абыйга бик зур рәхмәт»,  – дип өсти.

Илназ ирешкән уңышлар әле болар гына түгел: быел ул, өйдә укып, урта мәктәп тәмамлый. Казанда 4 ай укып, кул белән идарәгә көйләнгән машинада өйрәнеп, имтиханнарын уңышлы тапшырып, «права» ала. Бүген машинада йөри. Чавал авыл хуҗалыгы техникумына читтән торып укырга кереп, икътисадчы-бухгалтер белгечлеген үзләштерә.

Иң олы хыялың да чынга ашсын, уңышлар сиңа, авылдаш…

Ватаным Татарстан

Фото: автор