Татарстанда иң беренче тапкыр эндоскопик операция ясаучы якташыбыз

Аның бу хезмәтен икенче француз революциясенә тиңлиләр. Хирург операциянең икенче көнендә үк операция кичергән авыруның клиника коридорында йөрүен, алай гына да түгел, аның инде үзен өенә җибәрүләрен соравы бу төр операциянең өстенлеген раслый. Ә 1993 елда шушы җитди операцияне Татарстанда иң беренче тапкыр якташыбыз Татарстанда ясый. Монысына инде кеше җиңел генә: "тишеп кенә ясыйлар" дисә дә, эч махсус һава белән кабартылып, 3-4 металл көпшәләр- троакарлар "батырылып", шулар аша көчле салкын яктылык, видеокамералар һәм хирург кулы белән башкарылучы операция процессларының барысын да үтәүче "робот-манипулятор" төшерелә. Ә хирург компьютер экранына карап идарә итә. Кисеп алынган әйберләр, ташлар аерым каналдан чыгарыла... Сафинлылар нәкъ шушы юл белән сукыр эчәк, бавыр ише дистәләрчә органнарны "төзәтә" башлыйлар. Еллар үткән саен аның җитәкчелегендәге бүлек уңышлары белән ил күләмендә таныла, алай гынамы, бүгенгәчә бөтен Рәсәйгә, хәтта СНГга эндоскопистлар һәм эндохирурглар әзерләүче база булып тора.

Язманы әзерләгәндә янә бер журналистның 1998 елда Рәшит Шәрипович белән әңгәмәсенә юлыктым. Гәрчә инде Рәшитнең эндоскопик операцияләрне ясый башлавына хәйран вакыт үтсә дә, республикада киң кулланылмаган чоры бу. Журналистның шушы мәсьәләдә: "Ни өчен?"- дигән соравына табиб бу эшнең тоткарлануына, беренчедән, яхшы аппаратураның җитешмәвен, икенчедән, һәм иң әһәмиятлесе - операциянең рентген нурланышы астында башкарылуын, шуңа да күпләрнең бу эшкә алынасы килмәвен белдерә. " Мөгаен, бу өлкәдә үз эшеңнең фанаты булу, үз-үзеңне жәлләмичә эшләү кирәк"- дип җавап биргән ул. Еллар үтә, бүлектә елга 20 меңнән артык авыруга диагноз куелып, меңләгән кешенең үт куыгына операция ясый башлыйлар.
Һәм тагын бер авторның табибның шкафындагы "геологик" музейны хәтерләткән шәхси коллекциясендәге чын ювелир "табылдыклар" - маңгай тирен, энергиясен түгеп алынган "миналар"- төрле формадагы, төрле размердагы ташлар- аларны авторның "драгоценные камни хирурга Сафина"- дип тасвирлавы…

2013елның гыйнваренда РКБдан зурлап озаталар. Яраткан хезмәтеннән китүенә, мөгаен, авырый башлавы мәҗбүр иткәндер. Үз урынына алтын куллы, тирән белемле, ун елдан артык үзе янәшәсендә эшләп, бай тәҗрибә туплаган Арча егете Ринат Шиһабетдиновны калдыруга ирешә. "Бу эштә җитәкләү сәләтенә, "югарыларга" гына яраган белгеч эшли алмый, ә Ринат кешенең гомере өчен җанын бирергә әзер"- диде ул. Дөрестән дә, Сафинның шәкертләре үзләренең авыруларга карата яхшы мөгамәләре, гадилекләре белән аларда терелүгә ышаныч тудыралар. Бүлектә эшләүче шәфкать туташлары, санитаркалар, пешекчеләр һәм башкалар - барысы да үз эшләренә бирелгән шәхесләр. Йомгаклап шуны әйтеп була: Рәшит Сафин хастаханәнең эндоскопия хирургиясе бүлегендә чын коллектив туплап калдырган.