Фетнә вакытында вафат булучыларга чардуган куелды

- Бу әһелләргә гел намаз укыганнан соң дога кылам. Шул вакытларда билгесез җирдә ятуларына күңелем әрнеп, аларның барлыгын белдерүче чардуган куйдырасым килде. Әлеге фикеремне мин Балтач җирлеге башлыгы урынбасары Фиалка Закировага мөрәҗәгать иттем, ул исә әлеге фетнәне үз йөрәге аша үткәреп, бу саваплы эшне башкарырга риза булды. Инициативаны үз кулына алып, Балтач җирлеге башлыгы Илдар Габдрахмановка мөрәҗәгать итеп, икесе дә яшь булсалар да, изге эшне үз өсләренә алып башкарып чыктылар. Әлеге урын яшь буыннарга гыйбрәт һәм вәгазь булсын иде. Фетнәләр һәм сугышлар килеп чыкмасын, килеп чыкканнарын да сүндерергә омтылсыннар, тарихны онытмасыннар иде. Аллаһ каршында әлеге каберлектә ятучы кешеләрнең гөнаһлары булса кичерсен, ярлыкасын. Ә Рамазан айларында әлеге изге эшкә өлешен керткән һәркемгә дә Аллаһы Тәгалә әҗер савапларын бирсен, - диде әлеге эшне башлап җибәргән Гадения апа Булатова.