Балтачта авыл хуҗалыгы техникалары ничек саклана (фото)

Ильнур, 13 октябрь 2016 - 07:19

2431

Кышка аяк басар алдыннан ел да комиссия техникаларның сакланышын тикшерә.

Балтачта авыл хуҗалыгы техникалары ничек саклана (фото)

Район авыл хуҗалыгы идарәсенең авыл хуҗалыгы техникаларының төзеклеген тәэмин итүче комиссия әгъзалары 10 - 14 октябрь көннәрендә район буйлап йөреп, авыл хуҗалыгы җәмгыятьләренең машина-трактор паркларында техникаларның кышка әзерлеген тикшерү белән мәшгуль.

- Хуҗалыклар зоналарга бүленеп, җавап тоталар. Әлеге тикшерүләр ТР Авыл хуҗалыгы һәм азык-төлек министрлыгыннан кайтып тикшерә торган комиссия алдыннан әзерлек тә булып тора. Чөнки белгечләр тарафыннан киңәш-тәкъдимнәр әйтелә, кимчелекләр күрсәтелә. Дәүләт тикшерү комиссиясе билгеләгән таләпләрнең катгый рәвештә үтәлешен тәэмин итү бурычы куела. Комиссия әгъзалары баш инженерларның авыл хуҗалыгы техникаларын ремонтлау графигына һәм 2017 елгы язгы чәчүгә техникаларның әзерлеге турындагы планга нык игътибар бирелә.

Тикшерүләр барышында барлык төр үзйөрешле техникаларның һәм тагылма агрегатларның төзеклегенә, паркларда сакланышына, кышкы чорга саклауга куелышына, тиешле таләпләрнең үтәлешенә анализлар ясала, - дип ассызыклады идарәнең белгече Ришат Нуриев.

Комиссия әгъзалары шулай ук басу-кырларны кышка әзерләү, туфракны төп эшкәртү, туңга сөрү кебек көзге кыр эшләренең торышы белән дә уртаклаштылар. Язгы чәчүгә әзерлекне алдан кайгырту максатыннан, авыл хуҗалыгы техникаларын ремонтлау графигын булдыруны таләп иттеләр.