Хуҗалыгың бай булса, тормышың җай булыр яисә кайда күпме түлиләр

Узган ел райондагы 20 авыл хуҗалыгы җәмгыятендә 2509 кеше хезмәт куйса, быел ул 1нче июльгә 2520гә җиткән. Иң күп кеше - 204 - «Татарстан» хуҗалыгында эшли. Аннан кала «Дуслык» (186), «Яңа тормыш» (176), «Игенче» (156), «Бөрбаш» (145), «Кызыл юл» (141), «Сорнай», «Якты юл» һәм «Кама» (129ар кеше) җәмгыятьләре тора. Иң азы - 53, 76 һәм 83 кеше - «Уңыш», «Арбор», «Борнак»та. Җәмгыятьләрдә эшләүчеләр узган елгыдан 45 кешегә арткан. Аларның 16сы - «Дуслык»та, 15е - Тимирязев исемендәге хужалыкта. Шул ук вакытта 34 кеше киткән. «Бөрбаш»та, «Активист»та - 6шар, «Труд»та - 5, «Борнак»та 4 кеше узган елгыдан ким.

«Уңыш»тан кала барлык хуҗалыкларда да хезмәткә түләү фонды узган елның 1нче июлендәгедән артык. Бу, үз чиратында, эшләүчеләргә айлык хезмәт хакын арттырырга мөмкинлек биргән. Монда иң зур үсеш яшь җитәкче Булат Исрафилов эшли башлаган Тимирязев исемендәге хуҗалыкта - эшләүчеләрнең айлык хезмәт хакы 4885 сумга артып, быел беренче ярты елда 18741 сумга җитте. Һәм бу район авыл хуҗалыгы җәмгыятьләре арасында иң югары күрсәткеч. Хезмәткә түләү буенча мактаулы «Яңа тормыш»ны да уздырганнар, анда бер эшләүченең айлык хезмәт хакы 18727 сум тәшкил итте. Өченче урындагы «Труд»та ул 18286 сум. «Сосна» механизаторлары Фирдәвес Ситдыйков җитәкчелек итә башлагач, хезмәт хаклары артты диләр. Хәзер ул биредә бер эшләүчегә уртача 17412 сум тәшкил итә. Әле узган ел 14740 сум гына булган. Дилбегәне соңгы елларда гына кулына алган Айнур Нотфуллин җитәкләгән «Татарстан» хуҗалыгында да эшләүчеләргә түләү ел саен яхшыра. Быел 1нче июльгә айлык уртача хезмәт хакы узган ел елгыдан 1709 сумга күбрәк - 17932 сум булган. «Смәел»дә - 17884, «Сорнай»да - 17873, «Бөрбаш»та - 17031, «Кызыл юл»да 17026 сум тәшкил итә. Калган хуҗалыклар күпме түли? Сводканы айга иң аз түләүчедән башлыйбыз, 1нче июльгә, сумнарда: