Котькуд нунал — кыӵе ке но ужрад

Та веран Покчи Лӧзя лулчеберетъя юртын ужасьёслы но тупа.

28-тӥ толсурысен кутскыса 11-тӥ толшорозь калыклэсь шутэтскон нуналъёссэ тунсыкогес, улонзэ шулдыргес карон понна мыло-кыдо тыршизы лулчеберетъя юртлэн директорез Ринат Калимуллин но устолыкъя кивалтӥсь Галина Петрова. 

Выль ар шулдыръяськонъёсты Покчи Лӧзя гурт поселениын Вылын Ушма гурт мытӥз. 

— Выль арез котькин: пичиез но, бадӟымез но — туж шумпотыса вите, — шуэ Вылын Ушма гуртлэн одӥгез азьветлӥсез, дано шутэтсконысь дышетӥсь Екатерина Иванова. — Милям гуртамы клуб ӧвӧл ке но, 28-тӥ толсуре Покчи Лӧзя лулчеберетъя юртын ужась Галина Денисовна Петрова ваньместы шумпоттӥз. 

Азьло нуналаз магазин доры Ишмурзин Сашаен Яковлев Виталий кыз пуктӥзы. Соослы Апаков Анатолий юрттӥз. Вань гуртэн кызмес чеберъямы. 14.00 часэн гурт калык кыз доры люкаськиз. Пичиез но, бадӟымез но кыз котырын кырӟазы, эктӥзы но пӧртэм шудонъëсы пыриськизы.

Кык час шулдыръяськонмы туж ӝог ортчиз. Мылкыдмы ӝутскиз, пичи дырамы вуимы кадь. 

Котькуд шудонэ пыриськем понна милемлы кузьымъëс но дасям Галина Денисовна. Со кузьымъёсты басьтыны юрттэмез понна туж бадӟым тау «Сурнай» обществолэн кивалтэтэзлы. Вылын Ушма гуртамы шулдыр праздник ортчытэмзы понна сюлмысь тау кареммес вуттӥськом Галина Петровалы но солэн кузпалэзлы Ринат Калимуллинлы.

— Зэмзэ но, туж шулдыр вал. Вож кызэз котыръяса кырӟанъёс, пӧртэм шудонъёс калыклэсь мылкыдзэ ӝутӥзы, ваньзы сюлмысь шудӥзы, шулдыръяськизы. Нылкышноос но воргоронъёс гын сапег куязы, чорыгазы, «сизьымез одӥгзэ уг возьмало», «Тол Бабайлэн яратоно лыдпусэз» шудонъёсы но трос мукет конкурсъёсы пыриськизы. Та праздник калыкез уката матэ кариз. Сюлмысь тау каризы гуртоос, доразы бертыны но ӧз дыртэ. Кузьымъёс но трос вал, — пусъе Галина Денисовна, Вылын Ушмаын праздник радъямзы сярысь вераса. 

Собере праздник эстафетаез Покчи Лӧзя лулчеберетъя юрт басьтӥз: 31-тӥ толсуре отчы бал-маскарадэ куноос люкаськизы. 

— Туж трос вал пӧртмаськыса карнавал костюмен дӥсяськемъёс. Карадуванысь но Биктеш гуртысь куноос но вуэмын вал. Тол Бабай но Лымыныл трос пӧртэм шудонъёсты, вожвылъяськонъёсты ортчытӥзы. Мазэ веранэз, тужгес чидатэк витем минутъёс — со лотерея билетъёсты шудытон. Пылесос, тепловой пушка, ю тысь, сакыр песок, сӥль но трос мукет кузьымъёс адямиосты шумпоттӥзы.

Огъя вераса, выль арысен кутскыса, котькуд нунал сямен егитъёсын но шудонъёс ортчылӥзы: «Музыкальная почта зимы» ӝӧквыл теннисъя турнир, «Новогодний бум» но трос мукетыз.

7-тӥ толшоре пиналъёс люкаськизы празднике. Шулдыр вал, Тол Бабаен но Лымынылэн ӵош шудӥзы, кырӟазы соос.

10-тӥ толшоре Тол Бабай но Лымыныл Улын Ушма калыкез бордазы люказы. Покчиёзо школа дорысь кыз котырын арлыдоослэн но пиналъёслэн шудонъёссы, ӵошатсконъёссы праздникез чебертӥзы. Кезьыт тол куазь нокинлы интыяз сылыны ӧз сёты. Ваньзы дэмен шудӥзы, кузьымъёс басьязы.

11-тӥ толшоре Покчи Лӧзя лулчеберетъя юртын люкаськизы элегантной арлыдэн нылкышноос. Шулдыр шудонъёс, чай юон вискын кырӟанъёс, эктонъёс куноосты огазеязы. Сюлмысь таукылме вераме потэ выль ар шулдыръяськонъёсты ортчытыны юрттэм, праздник мылкыдэз кузьмам вань спонсоръёслы, — ивортэ Покчи Лӧзя лулчеберетъя юртысь устолыкъя кивалтӥсь Галина Петрова.

Туспуктэмъёс: Г. Петрова