Кыӵе луиз туэез «Мудорвай»? (1-тӥ люкет)

Котькуд адями арлэн пумаз кыӵе ке йылпумъянъёс лэсьтэ. Нош удмурт лулчеберетэн матын кусып возисьёс тодо: коньывуон-толсур толэзьёс «Мудорвай» улоскуспо вожвылъяськонэн герӟаськемын.

28 коньывуонэ «Мудорвайлы» аслэсьтыз ӧсъёссэ усьтӥз Ципьяысь лулчеберетъя юрт. Жаляса верано, Ципья нылпи садысь нылпиос тӧлчачаен (ветрянкаен) висьыны кутскемен но карантинэ ворсаськемен, сцена вылын 6 номер гинэ адӟыны кылдӥз. Но соос одно ик пыриськозы но асьсэлэсь дасям номеръёссэс возьматозы на. 
Озьы ке но, пыриськемъёсыз туж тунсыко но синмаськытӥсь луизы. Коллективен кырӟанъёс но кылбуръёс учкисьёсты шулдыртӥзы, каньыл мылкыд паӵатӥзы. Нылпиос сценалэсь ӧз кышкалэ, та нылпиослэсь ӟеч сямо луэмзэс возьматэ.

Пусйысал Сырья нылпи садысь Пчельников Ильяез. Ачиз пичи ке но, туж шумприч, дӥсьтӥсь. Соин лыдӟем кылбур но пуштросо луиз. 

29 коньывуонэ сюресмы вуттӥз Ӟаныысь лулчеберетъя юртэ. Татын огъя 15 номер луиз. Трослы тунсыко быръён этап пӧрмиз шуысал. Кырӟанъёс, калык эктонъёс, сценкаос, кылбуръёс, мае гинэ адӟыны уг луы вал татын! Нош кыӵе соослэн дӥськутъёссы! Паймод!

Татын нырысь ик тодмостысал Ӟаны шоръёзо школаысь 1-тӥ класслэсь коллективзэ. Ваньзы кытын ке асьсэды возьматӥзы. Яковлева Софья но Никифорова Елизавета кылбуръёс лыдӟизы. Лиза Николай Никифоровлэн — дано удмурт писательмылэн — внучкаез луэ, соин сыӵе данъяськымон вал учкыны, кызьы со бабаезлэсь «Коӵышпиос» кылбурзэ лыдӟе. Та классысь кылемъёсыз усто «Пиньтэмъёс» инсценировка возьматӥзы. Учкисьёслы со туж кельшиз, соосты зол кычабонъёсын пумитазы. Бадӟым сцена вылэ нырысьсэ потыса, пиналъёс ӧз ыштэлэ юн луэмзэс, рос-прос рользэс шудӥзы но серемес мылкыд кузьмазы. 

Арысь аре быгатонлыкъёссэс йылэтӥсь Антон но Андрей Камаевъёс таяз но кизилиос луизы. Дуэт амалэн кырӟамзы сяна, соос коллективысь выступлениосы но пыриськизы. Вӧзазы бабайзы — Виктор Камаев — но юрттӥськиз.

Та зонаез чылкак удмурт пиналъёсын тырмемын вал шуыны уг луы. Тугумова Милана Балтась гимназиын дышетске ке но, удмурт кылын усто кырӟаны быгатэ вылэм. Нош вӧзаз эктӥсь нылъёс номерзэ эшшо но яркытгес усьтӥзы. 

Озьы ик Балтась гимназиын дышетскисьёс — Александр но Алина Нарузовъёс — удмурт выжызэс шӧдыса, быгатонлыкъёсынызы паймытӥзы. Соос залэз кырӟанэн но кылбурен тырмытӥзы. 

Чебер но аспӧртэмлыко зона луиз. Соин но, дыр, ёросысь дышетонъя управлениысь дошкольной образования методист Гульнара Нутфуллина мылкыдъёссэ но вераз:

— Шумпотӥсько, ёросамы удмурт нылпиос асьсэлэсь сям-йылолъёссэс уг вунэто шуыса. Удмуртъёс — со сыӵе калык, кудӥз ноку уг вунэты аслэсьтыз выжызэ но сям-йылолъёссэ. Соос юн утё кылзэс но лулчеберетсэс, вӧлмыто но шараяло сое быдэс дуннее. Со ваньмыз нырысь ик семьяысь потэ, соин бадӟым тау шуэме потэ анай-атайёслы, песяй-бабайёслы, агай-апайёслы, тӥ нылпиосады ӝуатыса возиськоды калык дунлыкъёсты. Озьы ик дышетӥсьёслы, визьнодасьёслы бадӟым тау, соос азьланьто та ужез, нылпиосты усьто, быгатонлыкъёссэс эшшо но паськытало. Нылпиос, тӥ ӟечокъёс! Ноку эн вунэтэ асьтэлэсь кылдэс но лулчебереттэс. Котьку тодады возе: тӥляд вань пичи Татарстан Элькунды но тӥляд вань пичи гуртты, кудаз анай-атайёсыныды валче тӥ утиськоды кылдэс но калык узырлыктэс. Котьку данъяське кылэныды но оскымон луэ удмурт калыклы!