Кыӵе луиз туэез «Мудорвай»? (2-тӥ люкет)
Ёросамы улоскуспо вожвылъяськонлэн быръён этапъёсыз ортчизы
30 коньывуонэ бер-пуметӥез зона ортчиз Покчи Лӧзяысь лулчеберетъя юртын. Таиз самой трос лыдъем луиз. Валамон ини, татын троссэ бигер нылпи садъёсысь нылпиос луизы. Озьы ке но таиз зона но аслэсьтыз удмурт шӧмзэ ӧз ышты.
Сценалы кузё луыса, нылпи садъёсысь нылпиос эктӥзы но, шудӥзы но, кырӟазы но. Зэмос артистъёс выллем, кышкатэк быдэстӥзы азязы пуктэм ужпумъёссэс.
Татын пусйысал пичи кизилиез — Ассель Вафинаез. Со кылем арын но та вожвылъяськонэ пыриськиз. Туэ солы куинь арес ини. Озьы ке но, кылбур лыдӟыны со чик но ӧз кышка. Бадӟым сцена вылын муспотон нылаш вань учкисьёслэсь сюлэмзэс небӟытӥз. Азьланяз но Ассельлы выль вормонъёс гинэ сӥземе потэ.
Петрова Стефанияез но синйылтытэк кельтыны уг луы. Космонавтъёс сярысь кырӟанэз жингрес куараеныз быдэстэм сяна, солэн юрттӥсез но вал — Плотникова Мирослава — со сцена вылын аспӧртэмлыко театр возьматӥз. Валче номерзы эшшо но тунсыко луиз.
Огъя зонаосты вераса, нылпиослы бадӟым тау шуыны кулэ. Соос кышкатэк сценаын асьсэды эскеризы, шулдыртӥзы, бадӟымъёслы праздник кылдытӥзы шуи ке, уг янгыша, дыр.
Йылпумъянъёс сярысь ивортыны вожвылъяськонлэн Балтась этапезлэн председателезлы — Ольга Пчельниковалы — вазиськи.
— Вожвылъяськон куинь зонаын радъяськиз. Отчы огъя пыриськизы 191 нылпи. Арысь аре нылпиослэн лыдзы будэ. Золгес дасяськемзы шӧдӥське. Дӥськутъёс но пӧртэмгес луо. Тау кареме потэ дышетонъя управлениысь кивалтэтлы. Вожвылъяськонэн ялэмын бере, татын вормисез но луэ, берегес кылисез но вань. Со ик луэ стимул вуонояз эшшо но золгес дасяськыны! Таин вожвылъяськон уг быры на, вормисьёсты возьма гала-концерт, кудӥз 27 шуркынмонэ ортчоз шуыса витиське.
Кӧня ке малпаськытэ…
Туэ вань зонаосын луыса, кӧня ке малпаськонэ уси. Нырысь ик, трос гинэ кылоно луиз «шонерлык ӧвӧл», «кулэ луись уровенен дасяськыны уг луы пичи гуртъёсын», «бигеръёс гинэ гала-концертозь вуо», «удмуртъёсты берлань кельто» шуэм веранъёсты. Нош кин та понна кылкутыны кулэ? Котькуд дышетӥсьлы но визьнодасьлы тодмо вожвылъяськонлэн ортчон вакытъёсыз, дышетскон арлэн кутсконаз ик нылпиез дасяд ке, со одӥг гинэ ӧвӧл, дас номерлы дась луыны быгатэ.
Кыкетӥез, жюри пумысен но верасал. Кызьы удмурт вожвылъяськонын бигеръёс дунъет лэсьтыны быгато удмурт лулчеберетлы? Быриллям шат удмурт ӧнерчиос ёросамы? Удмурт кылэз но лулчеберетэз рос-прос валасьтэм ӧнерчиос кыӵе йылпумъянъёс лэсьтыны быгатозы? Кызьы кырӟанэз быдэстоно яке эктонысь огкадь выронэз ӵошатыны-а? Мон понна та валантэм.
Но кыӵе гинэ пумитъяськонъёс уг кылдо, нылпиосын тырмем вожвылъяськон шуныт тодэ ваёнъёс гинэ кельтэ. Нылпиос зэмзэ но ӟечокъёс! Шумпотӥсько, будӥсь поколенимы пичи ке но удмурт чеберлыкез адӟе но ас вылаз шӧдытэ. Сӥзисько пиналъёслы ёрос сцена вылын асьсэды возьматыса, Казанез но паймытыны.
Следите за самым важным и интересным в Telegram-каналеТатмедиа
Без социаль челтәрләрдә: ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен
Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.
Нет комментариев