Одӥг нуналэ – кык юбиляр (2-тӥ люкет)

Мукетыз героинямы — Зоя Илларионовна — быдэс улонзэ гурт возёс удыслы сӥзиз. Гумыраз фермаын тыршем: парсьёсты, ветылъёсты сюдэм, пӧртэм пумо ужъёсты быдэстыны вутскем. Пичи дырысеныз ик улон сое нуныямтэ: атаез — Илларион — жугиськонэ пыриськем. Шумпотымон, гуртаз со бертэм, татын ик берпуметӥ нуналъёссэ но ортчытэм. Озьы ке но, анай-атаез дырызлэсь вазь улонысь кошко, агай-вынъёсыз, сузэръёсыз но кулэмын ни.

Вань секытъёс пыр потыса, Зоя Илларионовна туннэ нуналлы тау карыны быгатэ, солэн шуныт валесэз но утялтӥсь семьяез вань.

(Пыр-поч биографизэ лыдӟыны луэ «Азьлане» газетлэн, 12.02.2021 арын потэм 5-тӥ номерысьтыз яке мерлыко вотэсысьтымы — ред.)
Быдэс улонзэ сюлмо кышномурт ортчытэм Карек-Серма гуртын. Ӧвӧл, дыр, гуртын солэсь трос но узыр история тодӥсь адями. Дунъяны луонтэм ивортодэт сётӥсь инъет луэ со. Ваньмыз потэ улонысь, озьы ик ваньмыз дунъяське улонысь лэсьтэм ужъёсъя. Нош ужъёсыз солэн пудоен герӟаськемын, мыло-кыдо тыршись нылкышно ас дыраз, нокыӵе ужлэсь палэнскымтэ. Сыӵе адямиос вылын ик возиськем гурт удыс, ёрослэн азьпалыз.
Туннэ нуналэ солэн улонэз пӧртэм пумо шумпотонъёсын но ӟеч иворъёсын гинэ герӟаськемын. Озьы ик улэ Геннадий пиезлэн но Алевтина кенэзлэн семьяяз. Соослы туж тау каре: «Утялто, вордо, ваньмыз миськемын, пересь адямилы мукет мар кулэ на», — шуэ песянай.
Зэмзэ но, туннэ нуналлы со яратӥсь песянай, ӵужанай но анай. Солэн дунлыкез матысьёсыз понна бадӟым. 90 арес — со улонэз пыр потэм адямилэн улон стажез, кудӥз пӧртэм учыръёсын но дыръёсын тырмемын.
Юбилей нуналаз сое ӟечкыланы лыктӥзы Бурнак гурт поселенилэн главаез Шамиль Хабибуллин но «Борнак» возёслэн представителез. Куноос сьӧразы кузьымъёс но вайиллям. Ветеран ужасьсэс данъяса, солы кема улон но юн тазалык сӥзиллям. Асьсэлэсь ужысь ӧнерчизэс соос уг вунэто, лэсьтэм ужзэ вылӥ дунъяло.
Улон — туж аспӧртэмлыко: куддыръя со чидантэм секыт потэ, нош мукет дыръя ваньмыз вӧй вылтӥ кадь мынэ. Кинлэн ке улонэз вордӥськем дырысеныз ик капчи, шумпотыса ортче, кинлэн ке вазь ик чиге, кин ке даурлэсь троссэ улыны быгатэ, кин ке улонзэ юнме каре. Соин но котькуд нуналэз берпуметӥзэ кадь улоно: пуш малпанъёстэ дыраз верано, мылкыдъёстэ дыраз шараяно. Улон сётэмын улыны но шаерлы пайдазэ лэсьтыны. Отын пӧртэмез луоз: шумпотонэз но, курадӟонэз но, ыштонэз но, быръёнэз но — ваньмыз воштӥське, азьлань мынэ. Нош арлыдоосты гажан — адямилэн валтӥсь ужез. Оло, быдэс улонад ӧкынод, дыраз вань шуныттэ но дырдэ ӧд сёты шуыса. Ваньзылы сое валаны кулэ!
Зинаида Кузьминичнаез но Зоя Илларионовнаез сюлмысен ӟечкыласьком ортчем юбилеенызы! Улонады котьку шумпотон мед луоз, шунытэсь киосады котьку матысьёстылэн киоссы мед луозы, выжыды арысен аре мед йылоз, нош сюлмады котьку ненег малпанъёс но шунытэсь кылъёс мед луозы. Тазалыкты но котьку юн сылӥсь тыпылэн кадь задор медло на!