Почтальон вае… Шумпотон

14-тӥ пӧсьтолэзе Россиысь почтаын ужасьёс асьсэлэсь ӧнер праздниксэс пусйизы.

Почта туала улонын но аслэсьтыз кулэлыксэ уг ышты на. Печатной изданиосты лыдӟыны яратӥсь адямиос озьы ик газетъёслы но журналъёслы гожтӥсько, кудӥз-огез гожтэт но гожъя, шер ке но, посылкаос келяло. 

Почта ёзэтлэн ужаз валтӥсь звено али ке но почтальон луэ. Бадӟым городъёсын солэн тыршемез сокем уг адскы, дыр, нош гурт интыын со — воштонтэн адями. Ӵапак сыӵе воштонтэм адями луэ Ушма гуртъёсысь калык понна почтальон Параманова Нина Фёдоровна но. 

Та чиед гинэ мугоро нылкышно тани укмыс ар мында ини газет-журналъёсын тырмытэм бадӟым сумкаез ас ненег пельпумъёсаз нуллэ. Мынон-ветлон средствоосыз — пыдъёс. Котькыӵе куазен Нина Фёдоровна аслаз маршрутэзъя почта нуллэ, Улын, Шор но Вылын Ушма гуртъёсын улӥсьёс корреспонденцизэс и пенсизэс дыраз мед басьтозы шуыса сюлмаське. 

Бен, кӧня иськем люкам меда ини Нина Фёдоровна укмыс ар ӵоже та маршрутэз ортчыса?

 
— Уг тодӥськы кӧня люкаськем меда, но котькуд нунал ог 7-8 иськем ортчисько, дыр, — шуэ кышномурт.

Котькуд адями аслыз сюлэмезъя уж уг шедьты, нош Нина Фёдоровна сыӵе адями, кудӥз ас интыяз.

— Ӧнерея мон швея-вышивальщица луисько. Но ужан сюресме Улын Ушмаысь клубын кутски, техничка луыса ужаны интыяськи. Кӧня ке дыр ортчыса, клублэн заведующиезлы тодмостӥзы. Собере фермаын скал кыски, табере тани почта нуллӥсько. Тыршид ке, котькыӵе ужез но быдэстыны луэ вылэм, — шуэ Нина Параманова. 

— Ӧд жаде-а али? — юасько мон.

— Луэ али, пыдъёс ветлыку, ветлӥсько. Уже аслым туж кельше. Планме но котьку тырмытыны тыршисько, шумпотыса пумитало пенсионеръёс но. Соосын вераськиськод ке, капчи луыса кошке. Созэ но, тазэ но вераськиськод. Соос улонлэсь марзэ валало ук. Жаляло но соос монэ, тамында ветлӥсько шуыса. Тунсыко соосын. Котькудӥзлэн аслаз сямыз.
Котькуд коркан Нина Параманова — витем куно. Юн вамышъяса ортче со котькуд юртэз, тодэ, кинлы туннэ пенси сётоно, кинлэсь коммунальной услугаос понна тыриськонъёссэ басьтоно, кинлы газет-журнал гожтоно, кинлы выль пресса ваёно. Бен, ужез секыт, но кӧня шумпотон со вае адямиослы! 

Адямиос пӧртэмесь, но котькудӥз ас сяменыз тунсыко. Кемалась ини соос Нина Фёдоровналы матын адямиос луизы. 

Нокин понна секрет ӧвӧл, трос газет-журнал лыдӟисьёс — со пенсионеръёс. Соос понна со бадӟым дуннее укно кадь. Тросэзлы соослы вераськон уг тырмы, соин арлыдоос ярато почтальонэн улон сярысь вераськыны, шумпотонзэс но кӧтӝожзэс вераны. 

Зэм верало, гурт почтальон со почтальон гинэ ӧвӧл, со юрттэт сётӥсь но, визь-кенеш сётӥсь но, психолог но луэ. Со сяна, почтальонлы пенси, пособиос сётъян, газет-журналъёсты нуллон, коммунальной тыронъёслы кагазъёсты сётъян сяна, пӧртэм вузъёсты но вузано. Озьыен, почтальонлэн вузкарисьлэн быгатонлыкез но луыны кулэ. 

— Вузкаронъя но план пукто. Вузкарон ласянь секыт ини милям татын, туж басьтэмзы уг поты. Кӧня быгатӥськом вузаськом, унозэ асьмелы басьтӥськом, — шуэ Нина Фёдоровна. 
Бен, гуртын вордскыса будэм адями нокыӵе ужлэсь уг кышка. Нина Парамановалэн семья улонэз но адӟем карымон. 

— Кузпалэ крестьян-фермер хозяйствоен кивалтэ. Пудомы уно, туннэ нуналэ 20-лэсь трос ини. Нылмылэн аслаз семьяез. Балтасьын уло, Покчи Лӧзя шоръёзо школаын директорлэн кенешчиез но математикаен дышетӥсь луыса ужа. Кыкто пиосмы маслозаводын ужало, одӥгез вӧй поттэ, кыкетӥез сыр лэсьтэ. Покчиез школаын дышетске на, — семьяез сярысь вера Нина Фёдоровна.

Ваньмыз ласянь ушъямон нылкышноез, ньыль нылпиослэсь анайзэ кивалтэтэз но туж гажа. Балтасьысь почта ёзэтысь ведущей ӧнерчи Кадрия Мингазева но Нина Парамановаез котькуд ласянь ушъя, адямиосын кыл шедьтыны быгатӥсь, ужзэ валаса быдэстӥсь почтальон шуыса вера. 

...Почтальон дыртэ адресъёсъя. Озьы вал 100 ар талэсь азьло но, али но, оскомы, азьланяз но озьы луоз шуыса. Та удысын ужасьёс понна валтӥсез — адямиослы шумпотон вайыны но одно ик вунэтоно ӧвӧл одӥгъёсызлы — пальпотыны, мукетъёсызлы — ӟеч кыл вераны, куинетӥсызлы — ёрос газетлы гожтӥськон сярысь тодэ вайытыны…

Юан — Валэктон

— Кыӵе газет-журналъёслы тросгес гожтӥсько?
— Тужгес трос «Азьлане» газет, таяз паларе 70 люкаськиз. Собере «Казанские ведомости», «Республика Татарстан», улон-вылонэн герӟаськем пӧртэм газет-журналъёс. Нылпи изданиос тани таяз паларын ӧвӧл.
— Удмурт изданиослы гожтӥськисьёс вань-а? 
— Удмурт изданиосты дышетӥсьёс басьто.
— Тужгес трос лыдӟиськись семья...
— Самой трос изданиос Антонова Наталия Львовна басьтэ. Вылын Ушмаын ӵемысь одӥг-кык издание гинэ басьто, Уллапалан всё-таки гожтӥсько.
— Туала дыре гожтэтъёс гожъяло-а?
— Гожтэтъёс вань, но со уноез — штраф гожтэтъёс. Армиысен гожтэтъёс но ӧвӧл ни табере.