«Сайяр» фестивальын егит кизилиослэн «яркыт ӝуатскемзы»

Туннэ нуналэ театр адямилэн улоназ бадӟым инты басьтыны кутскиз, адями лулпуш «сиёнлы» театре мыныны дыртэ, дырзэ пайдаё ортчытыны но шудӥсь артистъёсын тодматскыны. 

Телевизорысь киноен ӵошатыса, театрын кузь рекламаос но ӧвӧл, пуштросэз но калыклы матынгес, синъёс но урод пыӵетлэсь (воздействилэсь) утисько, эшъёсын пумиськыны муг но луэ. Театр — лулчеберетлэн нимысьтыз удысэз, кытын адямилэн лулпуш малпанъёсыз куддыр юртто, куддыр мултэс луо, но котькуд учыре адями аслэсьтыз быгатонлыкъёссэ шараяны быгатэ. Ас пыртӥз поттэм мылкыдъёсыз улонын но пайдаё луыны быгато: секыт дыре — буйгатскыны юртто, шумпотон вакытэ — улонэз чеберманы быгато. 

Театр но ас черодаз учкисез понна тырше: выльдӥське, пӧртэм выль ужан амалъёс пыртэ, вожвылъяськонъёс ортчытэ, егитъёсты бордаз кыске, мастер-классъёс радъя, огшоры калыкез синмаськытэ. Театрысь артистъёс уг быгато кӧня ке пол сценаосты шудыны, котькуд сцена сюлмысь потыны, учкисьлы тодэ кылись мылкыдъёс пыӵатыны кулэ.

Ёросамы но театр удысэз азинтыны кутскизы. Лулчеберетъя юртъёсын пӧртэм постановкаос пуктыло, школаосын но нылпи садъёсын артист ужлэн инъетъёсыныз тодмато. Вераны кулэ, пиналъёс но егитъёс мылысь-кыдысь пырисько, зэмос артистъёс выллем сцена вылын рользэс шудо, персонажъёссэс улонэ выжто. Школаосын озьы ик нимысьтыз ватсэт образование сётӥсь программа улсын театральной кружокъёс ужало. Озьы ик пусйыны кулэ: удмурт лулчеберетлэн «Мудорвай» вожвылъяськоназ но туэ театральной миниатюрая номинаци кылдытӥзы. Озьыен, нылпиос шумпотыса бадӟым сцена вылын устолыкъёссэс возьматыны быгатӥзы.

Туэ армы йӧскалык лулчеберетлы но сям-йылолъёслы сӥземын вал. Арлэн берпуметӥ толэзяз асьмеос ваньмы ужъёсмылы йылпумъян лэсьтӥськом. Вуоно арлы выль малпанъёс, ужпумъёс пуктӥськом. Озьы ик пинал артистъёс но тыршемзылэсь емышъёссэ бичало. 

Нылпиосмы, егитъёсмы ас дырзэс пайдаё, ёросмылы азинсконъёс кылдытӥсьёс луыны кулэ. Соин соослэн валтӥсь ужзы — пинал дырзэс шудо ортчытон, асьсэды сюлэмзыя кельшись удысын шедьтон. Соослэн серекъямзы понна ик али нюръясько, улонзэс сёто асьмелэн воргоронъёсмы, тазалыкез утисьёсмы но пӧртэм мукет удысысь ӧнерчиосмы. Пичиос асьсэлэсь люкетсэс но пырто та уже: гожтэтъёсынызы утисьёсмылэсь лул кужымзэс ӝуто, оскон кузьмало. 

Сыӵеесь асьмелэн пиналъёсмы: куддыр сямзы секыт, но соос туала дырен кыдатэмын. Азязы трос пӧртэм ужпумъёс пуктэмын, дышетскон сяна пӧртэм кружокъёсы, ватсаса тодон-валан басьтон, секциос, спортивной ужрадъёс, вожвылъяськонъёс, ӵошатсконъёс... 

Азьло дыре пиналъёсын ӵошатыны шонертэмгес луоз. Соос дырлэн реалиосыныз но кулэ каронъёсыныз валче вамышто. Улонмылэн азьланез соослэн юн киосазы но визьмо йыръёсазы. 

Улон туж ӝог темпен мынэ ке но, пиналъёс котькытын асьсэды возьматыны тыршо: ёрос но элькун вожвылъяськонъёсын, ӵошатсконъёсын данъяськымон азинсконъёсы вутско. Тани театр удысын но дышетскисьёсмы мукет ёросъёслэсь палэнэ уг кылё: нылпиослэн но егитъёслэн театръёссылэн «Сайяр» элькун фестивалязы пыриськыса, ёросмылы вормонъёс но кузьымъёс вайизы.
Пиналъёслы лулпуш лулчеберетэн но лякыт кусыпъёсын тунсыкъяськон мылкыд кылдытон понна, «2023-2030 аръёсы элькун кылъёсты но ТР-ысь мукет кылъёсты утён, дышетон но азинтон» элькун программаез улонэ пыӵатон вылысь ТР-ысь Дышетонъя но наукая министерство 2016 арысен «Сайяр» элькун фестивалез ортчытэ.
18-23 шуркынмонэ фестивальлэн зональной этапъёсыз элькунмылэн кун театръёсаз радъяськизы. Соос вить ёросъёсын ортчизы: Атня ёросысь, Набережные Челны, Буинск кун театръёсын, Казаньысь К.Тинчурин нимо драмая но комедия театрын, Альметьевскысь «Адымнар» театрын. 

Театральной выступлениос 3 арлыд категориын дунъяськизы: 7-11, 12-14 но 15-17 аресъемъёс пӧлын.

Постановкаос Элькунмылэн территорияз улӥсь калыкъёслэн вордскем (бигер, чуваш, удмурт, пор, мордва) кылъёсынызы вал. Сыӵе йӧскалыко луэм ужрад зэмзэ ик чебер, аспӧртэмлыко адӟиськиз. Элькунмылэн калык кусыпъёсыз эшшо но юнмазы, малпасько.
Нош кемалась ӧвӧл, 8 толсуре, Казаньысь Г. Кариев нимо бигер кун театрын сӥё-дано вормись но призо интыос басьтэм коллективъёсты данъян церемони ортчиз. Татчы пыриськизы ужрадэз радъясьёс, нылпиос но соослэн кивалтӥсьёссы. Кузьым басьтон — нимысьтыз шумпотон ужрад, нош нылпиос понна эшшо но данъяськымон. 

Ёросысьтымы та фестивальын 5 театральной коллектив пуйиськиз. Шумпотымон, соос пӧлын пӧртэм калыкъёс вань: бигерез но, порез но, удмуртэз но. Оскытэ: ёросамы йӧскалык уж эшшо но шаплыгес нуиськоз но пиналъёс ас выжызэс возьматыны азьланяз но уз кышкалэ, уз возьдаське. Тодматӥськом пиналъёслэн вормонъёсынызы:

— Ципья нылпи садысь коллектив 1 интыен пусйиськиз (кивалтӥсьёсыз — Гаврилова Н.Л., Тарасова Л.Н.);

— О.Н. Исаев нимо Ӟаны шоръёзо школалэн филиалэз — Вуж Кушкет гуртысь покчиёзо школалэн коллективез озьы ик 1-тӥ инты басьтӥз (кивалтӥсьёсыз — Карабаева С.М., Щербакова С.И.);

— Балтась гимназилэн коллективез 2 интыын (кивалтӥсьёсыз — Хакимзянова А.И., Егорова С.А.);

— Улисьял покчиёзо школа-нылпи садысь коллектив 3 интыен пусйиськиз (Фёдорова Л.А., Иванова О.Б.);

— Нурма шоръёзо школаысь коллектив «Творческой амалэн кутскон» номинациын вормисе потӥз.

Ваньзылы нимысьтыз Дышетонъя но наукая министерстволэсь дипломзэ но сертификатсэ кузьмазы.

Пиналъёсты но кивалтӥсьёсты бадӟымесь вормонъёсы вутскеменызы ӟечкыласьком! Азьланяз но та удысын вормонъёсты мед луозы но ёросмылэсь данзэ утьыны быгатонлыкъёсты мед будозы!