Шаплыосыз пӧлысь (фоторепортаж)

Кин ке Вӧйдырез келянлы сӥзем шулдыръяськонъёсты ортчытӥз, мукетъёсыз 8-тӥ южтолэзез пусйизы, нош шаплыгесъёсыз созэ но тазэ но радъяны вутскизы. Ӵапак сыӵеос пӧлы пыртыны луэ Покчи Лӧзя Лулчеберет юртын ужась Галина Петроваез но. Солэн тыршемезлы луыса, интыысь гурт поселениысь калык Нылкышноослэн калыккуспо нуналзылы сӥзем концертэз но учкиз, Вӧез но келяз.

8 южтолэзьлы сӥзем концерт программа туж быгатыса дасямын вал. Пӧртэм арлыдъем артистъёслэн выступлениоссы учкисьёслы туж кельшизы. Котькуд номер кужмо кичабонъёсын пумитамын вал. Залын пукись нылкышноосты праздникен ӟечкылазы нылпи садэ ветлӥсь пиналъёс но, школаын дышетскисьёс но, Лулчеберет юртын кылдытэм самодеятельной коллектив но. Озьы ик ӟечкыланъёсы пыриськизы Балтась Культурая центрысь кырӟасьёс но — Татьяна Ишмурзина но Айсылу Асадуллина. Соос но учкисьёслы асьсэлэсь чебер кырӟанъёссэс кузьмазы.

Нимысьтыз вераны кулэ Покчи Лӧзя Культура юртын ужась самодеятельной коллектив сярысь. Кемалась ӧвӧл соос ёросамы ветеранъёс пӧлын ортчем «Балкыш» фестивальлэн гала-концертаз пыриськизы. «Туж шумпотӥсько мынам сыӵе оскымон коллективе вань шуыса, тау соослы ваньзылы. Оскисько, вормонъёсмы таин гинэ уз йылпумъяське. Тани, кылдэм ке, 24-тӥ мартэ Кукморе мынонмы вань. Отын но умой гинэ выступить карыны мед кылдоз. Одӥг мылкыд каронэ вань: коллективмы эшшо но бадӟымгес мед луоз вал, адямиос мыло-кыдогес мед пыриськозы вал», — усьтэ ас мылкыдъёссэ Галина Денисовна. Оскомы, та ӟеч малпанъёс ваньмыз зэмалозы шуыса.