Выль аре кыӵе мылкыдэн пыриськом?

Малпасько, ортчись арлы йылпумъянъёс котькуд адями лэсьтэ. Отын умоез но, уродэз но, быдэсмымтэез но тырмыт луэ. Котыр пӧртэм яркыт тылъёсын пиштӥсь гирляндаос, лымы фигураос, машинаос дырто, адямиос бызьыло, магазинъёсысь вузъёс ичиёмо, лымыен шобырскем писпуос зэмос толлэсь тусбуйзэ суредало... Вань дунне дасяське матэктӥсь шулдыръяськон вакытлы.

Выль ар — котькуд адями понна нырысь ик шумпотон, паймымон вакыт, умоезлы оскон дыр. Котькин оске: оло, выль ар вуэмен, улонамы но воштӥськонъёс луозы. 

Чебермам юртъёс, яркыт тылъёсын ворекъясь ёросмы мылкыддэс ӝутэ-а? Йырады кыӵе самой бадӟым выль ар мылкыдды? Малпасько, бадӟымъёс понна со одӥг — дуннее тупаса улон жингрес нылпи куараосын но сайкыт инбамен мед вӧлмытскоз, нош пичиос понна — паймымон представлениос, школаосын, нылпи садъёсын ортчись выль ар праздникъёс, ческыт кузьымъёс... Нылпи понна туж тунсыко та ваньмыз, быдэс ар паймымон вакытэз витё соос.
Но ваньзы тодазы возё: дуннеын кык пуштросо югдур кылдэмын. Одӥг ласянь, матэктӥсь ар выль малпанъёс но осконъёс кылдытэ, пӧртэм мылкыдъёсты бугыртэ, кыкетӥез — дуннеысь кышкыт вакыт, кудаз трос кулон но бырон. Ваньмыз одӥг интые, одӥг вакытэ люкаськемын. Кызьы адямилэн йыраз ваньмыз та огазе луыны кулэ? Шулдыръяськоно яке ӧжытак возьмано? Узыр праздник ӝӧк дасяно яке кулэ луись сиён-юонъёсын гинэ буйгатсконо? Юанъёс зэмзэ но сюлэмшугъяськыто, малпаськыто. Мон понна, котькуд адямилэн аслаз учконэз та юанъёс ласянь. Котькуд кутэм решение шонер, сое нокин но курлано ӧвӧл. 
Вань калыклы одӥг валэктон сётыны уг луы. Ӝож ымнырын но куашкам мылкыдэн пумитаны шонертэм луоз, дыр. Нырысь ик — та праздник вылезлы оскытэ, нылпиослы шулдыр вакыт кузьма. Соос понна ик тыршоно пӧртэм пумо чилясь, югдытӥсь но паймытӥсь выжыкыл дунне кылдытыны. Соослэн сюрессы азинтӥське, улоназы пӧртэм шуг-секытъёсын пумиськоно луозы на, бадӟымъёслэн ужпумзы — соослы азьланяз каньыл улон кылдытыны.

Кыкетӥез — воргоронъёсмы асьмелэн шулдыр, каньыл улонмы понна ожмасько, кулонэн нюръясько, эшъёсынызы пыраклы люкисько. Кыӵе соослэн мылкыдъёссы? Выль ар соос понна зэмос праздник луоз меда табере? Малпасько, ӵапак та вакытэ соос пӧртэм пумо юрттэт возьмало, валтӥсез — лул кужымзэс ӝутон. Котькудӥз солдат вите шуныт кылъёсты, небыт ӟечкыланъёсты, матысьёссылэсь куаразэс кылыны.

Шаермы сьӧд тусо дуннее выйиз ке, куашкам мылкыдлы сётскимы ке, улонмылэн радлыкез ик сӧриськоз, батыр пиосмылэн тыршемъёссы юнме луозы. Тушмонлы возьматыны кулэ, кызьы одӥг бадӟым шаерын улӥсь калык пумит луись кужымлы пезьдэт (отпор) сётыны быгатэ. Мар та понна кулэ?

Нырысетӥез — ог-огмес гажаса но валаса улыны дышетсконо. Вожъяськон сямъёсты куштыса, бускельын юрттэт луыны; ӵыжы-выжыосын огъя люкаськыса, вераськыса дыр ортчытыны. Кыкетӥез — котырысь ваньзэ чебертыса, улонэ умойзэ пыртыны. Туала улонмы ӝог вамышъёсын азьлань мынэ, валаса вуттыны ик уг луы выль нуналлэсь вордскемзэ но нуналлэсь быремзэ. Соин котькуд семья пушкын ортчытэм шудо вакыттэс тодады возе, юалляське ӵыжы-выжыостылэн улэм-вылэмзы сярысь. Со понна ик Выль ар праздникез семьяен пумитано, шуо. Матынгес но дуногес адямиос тӥ понна ноку уз луэ, соос котьку юрттыны дась. Вашкала сям-йылолъёсты лыдэ басьтыса, валаны луэ: адямилэн валтӥсь кужымез семья бордын. Татын тонэ котьку витё, ярато, кылзо, визь-кенеш сёто. Тае ваньзэ дыраз дунъяны быгатоно, аръёс ортчыса ӧкыноно медаз лу, дыраз матысьёслы шуныт кылъёс вераса ӧй вутты шуыса.

Выль Арлэн валтӥсь символъёсыз

Нош кызьы дасяськоно пумитаны выль 2024 арез? Матэктӥсь ар — Вож Пу Драконлэн арез луоз. Ас киулаз шаермес шундыӝужан палась календарьысь одӥгез кужым но яркыт пӧйшур басьтэ. Азьланяз асьмеды аспӧртэмлыко, но тунсыко ар возьма. Соин паймымон чебер пӧйшурлэсь куронъёссэ одно ик лыдэ басьтоно. 

Дракон — ас понназ туж кужмо но етӥз мифической лулос. Солэн мугораз «пӧсь» вир кисьтӥське но тазалык кутӥське. Тае лыдэ басьтыса, котькуд адями аслэсьтыз мугорзэ кыдатыны кулэ, тазалыкезлы бадӟым саклык висъяны но сое нуналысь нуналэ юнматыны. 
Вож тус сэзьлыкез но небытлыкез возьматэ. Озьы ик вож тус инкуазьлэн валтӥсь тодметэз луэ. Гуртын улӥсь адями понна инкуазь — матысь эш луэ. Та туслэн адямилы сётӥсь влияниез но бадӟым: синъёс шутэтско, нош йырвиым буйгатске. Соин ик вож тус адями понна умой тусэн лыдъяське: со мултэс мылкыдъёсты кысэ, нош ӟечъёссэ — уноятэ. 

Нош пу — адямиослэн вашкала дырысен кулэ луись но валтӥсь лэсьтӥськон материалэз, со визьбуро луэмез возьматэ. Котькуд воргорон юртаз пулэсь кулэ луись арбериосты ас киыныз лэсьтыны быгатэ вал. Туннэ нуналэ но ас киын лэсьтэм арбериос туж вылӥ дунъясько. 

Коркаямы котьку шуд мед луоз шуыса мар кароно?

Нырысь ик котькуд арез котькуд ласянь дасяськыса возьмано. Кызьы шумпоттыны луоз Вож Пу Драконэз? 2024 арлэн кужымез пу бордын луоз, татын трос валатонъёс ватэмын. Котькуд адямилы трос луонлыкъёс сётэмын луозы. 

Кызьы вылӥынгес верамын вал ини, выль арын одӥгез валтӥсь символ луэ — пу. Писпу — со адями кадь. Зэмзэ ик, арезлы тупась символ луэ. Писпу но вордӥське, будэ, юнма, вӧлске, шуг-секытъёсын нюръяське, быре... Бӧрсяз кидысъёссэ кельтэ. Отысь ӝужало выль писпуос, выль улон... Адями но озьы ик утялтэмез кулэ каре, саклык висъямез вите. Бадӟымесь вормонъёсы вутскыны шонер вамышъёс лэсьтон понна адямилэн йырез котьку ӟеч малпанъёсын тырмемын луыны кулэ. Куке тон аслыд гинэ ӧвӧл, котыр дуннелы умой карыны тыршиськод, соку быдэс дунне но тыныд кык поллы бадӟымгес юрттэт сётэ. Нош лек мылкыдэн ке ваньмыз шоры учкиськод, соку тынад лулпушкад но «сьӧсь» каръяське.

Одно ик улоно коркан писпу суред луыны кулэ. Татын котькудӥз аслыз кельшись дизайнэн чеберматыны быгатэ. Шумпотымон, туннэ нуналлы дунне вылын пӧртэм арбериос но вань, нош сыӵе чеберманъёсты ас киын лэсьтӥд ке, эшшо но тунсыкогес луоз на. 
Калыкын верало: «Кызьы выль арез пумиталод, озьы ик сое ортчытод». Зэмзэ ик шонер веран. Татын адямилэн осконэз трослы бадӟым инты басьтэ. Макем адями выль арзэ чебер, тодэ кыльымон пусйыны тырше, сокем малпаназ но ваньмыз умой луоз шуыса оскон кылдэ. 

Кытын пумитано Выль арез?

Дракон — шӧдскымон бадӟым но ӟечлыко лулос. Выжыкылъёсын но со батыръёслы юрттэт сётэ, шонер сюрес палан сылэ. Со пиштыны но бордаз саклык висъяны яратэ. Озьыен, арез пумитан но аспӧртэмлыко луыны кулэ. Огдышемъя пумитан татын уг тупа ни, выль арез ӵашетыса, чебер пумитано. 

Котькуд адямилэн выль ар пумитанын аслаз сям-йылолъёсыз, радлыкез, кин ке котьку эшъёсыныз пумита, кин ке одно ик семья пӧлаз луыны тырше, но валтӥсез — сюлмад ваньмыз шонер но чылкыт мед луоз. Сюлэмдэ паськыт усьтыса, вань ӟечез но умоез мед пыроз, сяськаяськыса, ӟырт кезьыт нуналъёсы но шунды мед пиштоз. 

Гажано эшъёс! Выль ар — выль луонлыкъёс! Со котькуд адямилы шудо но сайкыт улон мед кузьмалоз. Сӥзисько тӥледлы пиштӥсь улон но сяськаяськись дунне. Та арысь шумпоттӥсь но шунтӥсь вакытъёсты выль арын эшшо но тросгес мед луозы, вӧзады котьку яратоно но матысь адямиосты мед луозы! Матэктӥсь Выль арен!