Күрәгәнең файдасын беләсезме?

Күрәгәнең күп нәрсәгә файдасы бар икән:
- Күз өчен
Составындагы каротин (А провитамины) күз күремен яхшырта икән.
- Ябыктыра
Ашыйсы килгәндә ризыкка ябырылганчы авызга күрәгә кабып, аны суырып йөрсәң һәм аннары озак итеп чәйнәсәң, ул ашыйсы килү теләген баса. Организмга калория дә бик аз күләмдә керә.
- Канны яхшырта
Күрәгә кандагы тимер күләмен арттыра, димәк, гемоглобинны яхшырта. Шуңа да анемия вакытында, йөклелек чорында күрәгә ашарга киңәш итәләр.

Белеп торыгыз: күрәгә, әстерхан чикләвеге, йөзем (барысын да иттарткычтан чыгарырга кирәк) һәм балдан ясалган катнашма организмны витаминнар, минералларга да баета, кандагы начар холестеринны да чыгара.

- Ашкайнату өчен
Кипкән абрикос эчне йомшартырга сәләтле һәм шуның ярдәмендә эчәклекне чистарта.
- Йөрәк өчен
Күрәгә йөрәккә шифалы, чөнки ул калий, магний, тимер кебек элементларга бай. Инфаркт кичергәннәргә күрәгәне караҗимеш белән бергә ашау хәерле.

Игътибар!
Күрәгә ничек кенә файдалы булса да, аны артыгын ашарга ярамый. Күп ашаганда эчәк эшчәнлеге бозылырга, эчкә газ җыелырга мөмкин. Организмга артык шикәр керү дә зыянлы.

Аны көненә 3 – 5 данә ашау да җитә ди белгечләр.

Чыганак: Кызыл таң