Чиста булсын, балкып торсын!

Ильнур, 1 октябрь 2013 - 06:17

2558

Елның-елында республикабызда «Татарстанның чиста урманнары» акциясе зур колач белән үтә. Быел да ике этапта: берсе язын, икенчесе көзен игълан ителде.

Бу хакта «Балтач» дәүләт тыюлыгы җитәкчесе Альберт Фәрхетдинов, инспектор Рамил Хаҗиев менә нәрсәләр ди:
- Районыбыз буенча яз көне 19 оешмадан 163 кеше катнашты, 56 кубометр чүп җыйналды. Мәктәп укучылары катнашында табигать һәйкәле саналган урыннар, шул исәптән Шушма елгасы чүп-чардан чистартылды. Көзге этапта да эш матур гына оешып китте. Беренче ай гына булса да, бүгенге көндә 4 оешма бу эшкә катнашырга өлгерде инде. Алар көче белән 11 кубометр чүп җыештырылды. Форсаттан файдаланып, без барлык коллективларны бу изге эштә актив катнашуларын теләр идек. Барыгызны да елга-сулыкларны, урман тирәләрен, бигрәк тә кортлыклары булган арендаторларны үз участокларын даими чистартып торуларын сорыйбыз.