90 яшьлегенә килгән кунакларны мичтә пешкән бәлеш, коймак белән сыйлады (фото)

Ишле гаиләдә үсеп, үзе дә 8 балага гомер бүләк иткән ана бүген онык һәм оныкчыкларга бик бай. 13 оныгы, 18 оныкчыгы янәшәсендә хәзерге көннән канәгать булып, һәркайсының тормышлары белән кызыксынып гомер итә. Балтачта, Яңа Салавычта яшәүче кызлары да "Әнибез янына килү үзе бер бәхет, сөенә-сөенә киләбез. Ул әле дә безне үзе пешергән бәлеш, гөбәдияләре, пәрәмәч, коймаклары белән каршы ала. Гел хәрәкәттә булды, хезмәттән курыкмады. Безне дә хезмәт тәрбиясе белән, эшкә өйрәтеп үстерде. Без аңа хәерле гомер, исәнлек-саулык телибез. Бу нигездә әтиебезнең әтисе 96 яшендә гомер куйды. Килен кайнана туфрагыннан диләр, шуңа күрә әниебезгә Ходай озын гомер биргәндер..." - диләр.

Чыннан да, Нәкыя апа 90 яшьлегенә килгән кунакларны үзе әзерләгән мичтә пешкән бәлеш, коймак белән сыйлады.

Район башкарма комитеты җитәкчесе урынбасары Илһам Гайнетдинов тарафыннан юбилярга Россия Президенты В.В. Путинның Котлау хаты, район башлыгы Рамил Нотфуллинның котлавы һәм бүләге тапшырылды. Нәкыя апа Таҗетдинованы шулай ук район социаль яклау бүлегенең "Наз" халыкка социаль хезмәт күрсәтү үзәге мөдире Гөлнара Әхмәдиева, Чепья авыл җирлеге башлыгы Азат Нотфуллин, «Арбор» җәмгыяте җитәкчесе Хәмит Баязитов туган көне белән тәбрикләп, ихлас теләкләрен ирештерде.